आः उपराष्ट्रपतिया विवाद, सत्ता गठबन्धनं हे स्वम्ह उम्मेदवार पिहां वल
येँ (नेपालभाषा टाइम्स)- राष्ट्रपतिया चुनाव लिपा उपराष्ट्रपति चुनावया तयारी जुयाच्वंगु हे इलय् निर्वाचन आयोगं राष्ट्रपति खस आर्य समुदायया मिजंम्ह वःगु जुयाः उपराष्ट्रपतिया उम्मेदवार चाहिँ खस आर्य मिजं स्वयां बाहेकयाम्ह जुइमाः धकाः सुचं पिकायेवं उम्मेदवारीया तयारी यानाच्वंगु पार्टीत अन्यौलय् लाःगु दु ।
उकिया नापं मधेसवादी पार्टीतय्सं उप राष्ट्रपति पदय् थःथःपिंसं हे उम्मेदवारी घोषणा याना हःगुलिं थ्वहे कारणं यानाः वर्तमान सत्ताधारी च्यागू दलीय गठबन्धनय् नं समस्या पिहां वइगु खः लाकि धइगु आशंका ब्वलंगु दु ।
च्यागू दलीय गठबन्धनं जसपायात उपराष्ट्रपति बीगु धकाः सहमति दयेकूगु खःसां जसपां बिउम्ह उम्मेदवार योग्य मजुइवं जनमत पार्टी व नागरिक उन्मुक्ति पार्टीं नं उम्मेदवार न्ह्यःने तये हःगु दु । जनमत पार्टीं ममता झायात उम्मेदवार दयेकूगु दुसा नागरिक उन्मुक्ति पार्टीं थः अध्यक्ष रञ्जिता श्रेष्ठयात उम्मेदवार दयेकूगु दु । तर श्रेष्ठया उमेर मगाःगु जुयाः वय्कः नं उम्मेदवार जुइ मखनीगु जूगु दु ।
जसपां उम्मेदवार घोषणा याःम्ह रामसहाय यादव अयोग्य जुइवं आः मेम्ह सुयात थनी धइगु निश्चित मजूनि । अथे ला जसपां आः तक नं राष्ट्रपति मिजं जुइवं उपराष्ट्रपति मिसा जुइमाः धइगु व्यवस्था गनं नं उल्लेख याना मतःगु जुयाः निर्वाचन आयोगं जारी याःगु सुचंया औचित्य मदु धकाः दावी यानाच्वंगु दनि । आयोगया थ्व सुचंयात कयाः सत्ता गठबन्धन दुने हे विवाद पिहां वःगु दु ।
उपेन्द्र यादवया म्हगस चकनाचुर
उपराष्ट्रपति पदय् नं लैङ्गिक व जातीय समीकरण मिले यानाः उम्मेदवारी बीमाः धकाः निर्वाचन आयोगं सुचं जारी यायेवं जसपाया अध्यक्ष उपेन्द्र यादवया उपचुनाव ल्वायेगु म्हगस चकनाचुर जूगु दु । जसपां प्रतिनिधिसभाया सांसद रामसहाय प्रसाद यादवयात उपराष्ट्रपति दयेकाः पार्टी अध्यक्ष उपेन्द्र यादव वय्कःया थासं चुनाव ल्वायेगु योजना दयेकाच्वंगु खः । पार्टी अध्यक्ष उपेन्द्र यादवं रामसहाययात उपराष्ट्रपतिया उम्मेदवार दयेकाः थः बारा–२ पाखें चुनाव ल्वायेगु तयारी याःगु खः । थ्व स्वयां न्ह्यः जूगु निर्वाचनय् सप्तरी–२ पाखें उपेन्द्र यादव सिके राउतपाखें पराजित जूगु खः ।
LEAVE YOUR COMMENTS