येँयाः स्वयेत नीम्ह विदेशी पाहाँ वइगु
येँ (नेपालभाषा टाइम्स)÷ येँयाः जात्रा स्वयेगु निंतिं येँ महानगरपालिकाया ब्वनाय् नीम्ह विदेशी व नीनिम्ह स्वदेशी पाहाँपिं वइगु जूगु दु । येँ महानगरपालिकापाखें सोमवाः ग्वसाः ग्वःगु पत्रकार सम्मेलन येँ महानगरपालिकाया प्रवक्ता, सूचना, संचार तथा प्रविधि संयोजक व १७ वडाया अध्यक्ष नविन मानन्धर येँ महानगरपालिकाया भगिनी सम्बन्ध दयेधुंकूगु थीथी देय् नगरपालिकाया प्रतिनिधिपिं येँयाः स्वयेत वयेत्यंगु खँ कनादिल ।
वय्कःया कथं येँ महानगरपालिका चीन, अमेरिका व कोरियाया पाहाँपिं येँय् वइगु जूगु खः । येँ महानगरपालिकाया थुपिं स्वंगू देय् लिसें भारत, जापान, बेलारुस व स्पेनया थीथी नगरलिसे नं भगिनी स्वापू दयेधुंकूगु दु । थुकी मध्ये दकलय् अप्वः चीनया न्हय्गू शहर, अमेरिकाया प्यंगू शहरलिसे भगिनी स्वापू दयेधुंकल ।
पत्रकार सम्मेलनय् न्ववासें येँ महानगरपालिकाया उपप्रमुख सुनिता डंगोलं थुगुसी नं येँ महानगरपालिकां येँयाः जात्रायात अभिभावकत्व ग्रहण यासें तःजिक जात्रा हनेगु निंतिं तयारी यानागु खँ कनादिल । वय्कलं थुगुसीया जात्रा नं भव्य व सभ्य कथं यायेत सकलसिनं थःथःगु थासं ग्वाहालि यानाः जात्राय् ब्वति कायेत नं इनाप यानादीगु दु ।
LEAVE YOUR COMMENTS