ने. सं. ११४३ तछलाथ्व त्रयोदशी -

प्रदेशय् मन्त्री थपे यायेत दबाब

येँ – प्रदेश १ या सरकारं थःगु मन्त्रिमण्डलय् प्यम्ह राज्यमन्त्री थपे यायेवं आः मेमेगु प्रदेशया सरकारय् नं मन्त्री थपे यायेगु लागिं मुख्यमन्त्रीतय्त दबाब शुरु जूगु दु । अज्याःगु दबाबया कारणं गुलिं मुख्यमन्त्रीतय्सं मन्त्री थपे यायेगु तयारी शुरु याःगु दुसा गुलिं धाःसा छु याःसा जी धाये मफयाः अन्यौलय् लानाच्वंगु दु ।

सत्तारुढ दल नेपाल कम्युनिष्ट पार्टीं धाःसा प्रदेशय् मन्त्रीया संख्या अप्वः मतयेगु धकाः न्हापा हे निर्णय याना तःगु दु । संविधान कथं कुल सांसद संख्याया २० प्रतिशत तक मन्त्री जुइ दइगु व्यवस्था दु । अथे खःसां तत्कालीन एमाले व माओवादी गठबन्धनं कुल सांसद संख्याया १० प्रतिशतयात जक मन्त्री दयेकेगु सहमति याःगु खः । लिसें प्रत्येक प्रदेशय् ७ गू जक मन्त्रालय दयेकेगु निर्णय नं अबले याःगु खः । मन्त्रीया संख्या अप्वः जुइ धकाः गुलिखे प्रदेशया मुख्यमन्त्रीतय्सं निगू निसें निगू तक मन्त्रालय हे थःपिंसं कायेगु समेत याःगु खः ।

तर आः नकतिनि प्रदेश १ या नेकपा सरकारं प्यम्ह राज्यमन्त्री थपे यायेवं मेमेगु प्रदेशया मुख्यमन्त्रीतय्त नं मन्त्री थपे यायेत दबाब लाः वंगु खँ सीदुगु दु । अज्याःगु हे दबाबया कारणं बागमती प्रदेशया मुख्यमन्त्री डोरमणि पौडेलं मन्त्रिमण्डल थपे यायेगु तयारी शुरु यानादीगु खँ धाःगु दु । तर मन्त्री थपे यायेगु धाःसां आपालं सांसदतय्सं मन्त्री जुइगु इच्छा प्वंकाच्वंगु जुयाः सु सु हयेगु धइगु समस्या जुयाच्वंगु खँ वय्कःलिसे सतीगु सूत्रं धाःगु दु ।

उखे गण्डकी प्रदेशया मुख्यमन्त्रीं धाःसा थःपिनि लागिं ७ गू मन्त्रालयं मगाः धासें भौतिक पूर्वाधार व वातावरण थेंज्याःगु मन्त्रालय हे टुक्रा यानाः जूसां मन्त्रालयया संख्या अप्वयकेमाःगु सुझाव समेत बियाच्वंगु खँ सीदुगु दु । नेकपाया केन्द्रीय नेतातय्सं धाःसा मन्त्री थपे यात धाःसा प्रशासनिक खर्च अप्वइ धासें आः दुगु संरचनापाखें हे ज्या चले यायेमाः धयाच्वंगु दु ।