असारय् जक विकास खर्च १७.५ प्रतिशत

येँ – दँय्दसं असार महिना वल कि जक व्यापक रुपं विकास खर्च यायेगु ज्या गुलि तीव्र रुपं न्ह्याइगु जुयाच्वन धइगु खँ महालेखा परीक्षकं नकतिनि तयार याःगु छगू रिपोर्टं बांलाक क्यना बिउगु दु । महालेखाया उगु रिपोर्ट कथं थुगु दँया विकास खर्च असार महिनाय् जक मुक्कं १७.५ प्रतिशत जूगु दु ।

मुक्कं लछिया दुने जूगु थ्व विकास खर्च न्हापा न्हापा जूगु खर्चया तुलनाय् तसकं अप्वः खः । वंगु खुलाय् जूगु विकास खर्च स्वयां नं थ्व लछिया दुने जूगु विकास खर्च अप्वःगु खँ नं रिपोर्टय् धयातःगु दु ।

रिपोर्टय् धयातः कथं सरकारं विकास खर्चया लागिं धकाः छुटे याःगु कुल बजेट मध्ये वंगु खुलाय् १४ प्रतिशत जक खर्च जूगु खः । खुलाय् १४ प्रतिशत जक विकास खर्च याःगु सरकारं असार महिनाय् धाःसा मुक्कं लछिया दुने १७.५ प्रतिशत खर्च याःगु खः ।

महालेखाया रिपोर्ट कथं थुगु बजेटया न्हापांगु स्वलाय् मुक्कं ४.६ प्रतिशत जक दां खर्च जूगु खः । वयां लिपा खुलाया दुने १४ प्रतिशत खर्च याःगु खःसा ९ महिनाया दुने ३५ प्रतिशत खर्च याःगु खः ।

सरकारं विकास खर्चया लागिं थुगु बजेटय् ३ खर्ब ३५ अर्ब दां फ्याःगु खःसा असार लछिया दुने ५९ अर्ब दां खर्च याःगु खः ।
न्ह्याबलें नं दछियंकं छुं ज्या मयाइगु व असार महिना त्यल कि छुटे याना तःगु ध्यबा ल्याप्स जुइ धकाः हतर पतर ध्यबा खर्च यायेगु सरकारी निकायतय्गु बानीं यानाः थथे जूगु खँ विज्ञतय्सं धायेगु याः । थथे असार महिना वल कि जक विकासया लागिं छुटे यानातःगु ध्यबा खर्च याइगु जूगुलिं विकासया ज्या याइपिं ठेकेदारतय्सं लाक्वपाक्व ढंगं गुणस्तरहिन ज्या याइगु खँ नं चर्चाय् वयाच्वंगु दु ।

आः असारय् जक खर्च मयाकीगु

न्ह्याबलें नं असार महिनाय् थ्यंकाः विकास बजेट खर्च यायेगु थ्व ज्यायात पनेगु लागिं आः अर्थ मन्त्रालयं पहल यायेत्यंगु खँ सीदुगु दु । सूत्रतय्सं धाः कथं आः सरकारं निश्चित ई हे तोके यानाः निश्चित रकम खर्च याये मफुत धाःसा अज्याःगु परियोजनाया लागिं बजेट हे निकास मयायेगु कथंया ग्वसाः दयेकाच्वंगु खँ धाःगु दु । छगू योजनाया लागिं छुटे याना तःगु ध्यबा अन खर्च मजुल धाःसा मेमेगु ज्याय् रकमान्तर यानाः ध्यबा यंकेगु प्रवृत्ति अप्वः दुगुलिं आः सरकारं उकियात नं पनेगु तयारी यानाच्वंगु खँ सीदुगु दु । थ्व ज्यायात अर्थ मन्त्रालयपाखें कडाई यायेगु तयारी यानाच्वंगु दुसा उकिया लागिं सरकारयात महालेखा परीक्षकं नं निरन्तर सुझाव बियाच्वंगु खँ धाःगु दु । असार महिनाय् अप्वः बजेट खर्च याइबलय् उकी यक्व भ्रष्टाचार नं जुइगु जुयाच्वंगु दु ।

सम्बन्धित बुखँ

LEAVE YOUR COMMENTS