ने. सं. ११४६ बछलाथ्व पञ्चमी - दयावीरसिं बुदिं

मेलम्ची ः न्हूम्ह हे ठेकेदार माःसा बांलाइगु सुझाव

येँ – मेलम्ची खानेपानी आयोजनाया ठेकेदार कम्पनी सीएमसीयात लित हयेगु पलेसा न्हूम्ह ठेकेदार कम्पनीयात बियाः ज्या याकूसां उपयुक्त जुइगु सुझाव संघीय संसदया राष्ट्रिय सरोकार तथा समन्वय समितिया बुधवाःया बैठकय् समितिया दुजः सुरेन्द्रराज पाण्डें कनादीगु दु ।

वय्कलं मेलम्ची आयोजनां नाकाबन्दी लगायत थीथी कारण क्यनाः सरकारयाके क्षतिपूर्ति वापत २ अर्ब ५२ करोड फ्वंगु धासें उकिया पलेसा न्हूम्ह ठेकेदार ल्ययाः ज्या याकेबलय् अझ म्हो जक खर्च जुइगु जुयाः न्हूगु प्रक्रिया न्ह्याकेमाःगु सुझाव नं बियातःगु दु । सुझाव कथं न्हूगु प्रक्रियां आयोजनाया ज्या न्ह्याकेगु खःसा २ अर्ब ४५ करोड तकां ज्या सम्पन्न जुइगु दावी नं यानातःगु दु ।

आयोजना अलपत्र त्वःताः वंम्ह ठेकेदार कम्पनी सीएमसीया स्थलगत अध्ययन लिपा उगु सुझाव बिउगु खः । समितिया दुजः पाण्डें उगु आयोजनाया ज्या याकनं न्ह्याकेत नं सरकारयात सचेत याःगु दु । सरकारं सीएमसीया धरौटी वापत तयातःगु २ अर्ब १० करोड तका ध्यबा सरकारं जफत यायेधुंकूगु दु ।

मेखे मेलम्ची खानेपानी आयोजनाया ज्या आः गबले जुइ धइगु अन्यौल झनझन तच्वया वंगु दु । छखे खानेपानी मन्त्री विना मगर सीएमसीयात लित हयेमाः धकाः लबिङ यायेगु ज्या यानाच्वंगु दुसा मेखे खानेपानी मन्त्रालयया सचिव निसें कर्मचारीत धाःसा गुगुं नं हालतय् सीएमसीयात लित महयेगु अडान कयाच्वंगु दु ।

थ्वहे झ्वलय् म्हिगः खानेपानी मन्त्री मगरं छगू प्रेस विज्ञप्ति जारी यासें मेलम्ची खानेपानी आयोजना निर्वाधरुपं न्ह्याकेगु निंतिं सरकारं कुतः यानाच्वनागु खँ धाःगु दु । मन्त्रालयं म्हिगः जारी याःगु विज्ञप्तिइ मन्त्री मगरं मेलम्ची खानेपानी विकास समितिं थीथी विकल्पया सहलह जयानाच्वंगु खँ धासें आयोजना क्वचायेकेत याकनं हे ठोस निर्णय जुइगु खँ न्ह्यथनातःगु दु ।

लिसें प्रेस विज्ञप्तिइ मेलम्ची खानेपानी आयोजना छगू स्वायत्त संस्था जूगुलिं उकिं थम्ह हस्तक्षेप यानाच्वन धकाः वयाच्वंगु खँ फय्गं खः धासें आयोजनाय् थम्हं अनियमितता यानागु प्रमाणित जूसा गुगुं नं कथंया सजाय फयेत तयार दु धयातःगु दु ।