सिद्धिदास बुन्हिया नसंचा म्येँ पिदन

येँ(नेपालभाषा टाइम्स)- महाकवि सिद्धिदास महाजु (अमात्य)या बुन्हिया लसताय् नसंचा उलीगु इलय् हाला वयाच्वंगु ब्याहांचुलि म्येँ लय्बद्ध यानाः पिथंगु दु ।

नेपालभाषा साहित्यया पुनःजागरणकालया प्यंगःथांमध्ये छगः महाकवि सिद्धिदास महाजुया बुन्हिया लसताय् नसंचा उलीगु इलय् हाला वयाच्वंगु ‘थौंया दिन कवि गुरु सिद्धिदास बूगु रे’ ब्याहांचुलि लसय् लय्बद्ध यानाः पिथंगु खः ।

जनकवि दुर्गालाल श्रेष्ठं च्वयादीगु ब्याहांचुलि म्येँया संगीत संयोजन जीवित जल्मीं यानादीगु खःसा पवित्र कसाः, दीपा महर्जन, अमोघवीर वज्राचार्य, अनु शाक्य, सिद्धार्थ शाक्य, सोनिका मानन्धर, निभा डंगोलं सः बियादीगु दु ।

वंगु शुक्रवाः आलुपालु रेष्टुरेन्टय् जूगु बःचाधंगु ज्याझ्वःया दथुइ भाषासेवी ज्ञानेन्द मानन्धरं पितब्वज्या यानादीगु खः । थुगु ब्याहांचुलि म्येँया भिडियो नं निर्माण याःगु खःसा थुकिया छाँयाकन पवित्र कसाः व राजेश डंगोलं यानादीगु खः ।

महाकवि सिद्धिदास महाजुया बुन्हि ने.सं. ९८७ यंलागा दुतियाकुन्हु खःसा दँय्दसं यंलागा दुतियाकुन्हु नसंचा उलेगु याना वयाच्वंगु दु । छुं दँ न्ह्यःनिसें दिनाच्वंगु नसंचा उलेगु ज्याझ्वः थुगुसी हाकनं न्ह्याकीगु जुयाच्वंगु दु ।

सम्बन्धित बुखँ

LEAVE YOUR COMMENTS