ताम्रकार समाजया साधारणसभा व मंकाः मुँज्या

यल – ताम्रकार समाजया झिंन्हय्क्वःगु साधारणसभा व नीस्वक्वःगु मंकाः मुँज्या वंगु शनिवाः समाजया थःगु हे जावलाख्यलय् च्वंगु भवनय् जुल । समाजया नायः रविन्द्रराज ताम्रकारया सभापतित्वय् जूगु मुँज्याय् नेवाः देय् दबूया नायः नरेश ताम्राकार मूपाहांकथं झायादीगु खः । ज्याझ्वलय् नवासें मूपाहां ताम्राकारं राजनीतिक चेतनाया कमिया कारणं नेवाः समुदाय न्ह्याः वने मफुगु खः धासें आः नं थथे हे लाचार जुयाच्वनेगु खःसा नेवाःत गबलें नं थहां वये फइमखु धयादिल ।

देय्या कला, संस्कृति, सम्पदाया उत्थानय् ताम्रकार समुदायया भूमिका महत्वपूर्ण दुगु धासें ताम्रकार वर्गया शीप, कला, कौशलयात ल्यंका तये फत धाःसा समग्र देशं हे उकिया लबः काये फइ धयादिल । ज्याझ्वःया सभापतिलिसें समाजया नायः ताम्रकारं नेवाः समुदायया मौलिक संस्कृति,रहनसहन, भाषा क्षेत्रय् जुयाच्वंगु अतिक्रमण तसकं चिन्ताजनक जूगु धासें थुकी मेपिंत द्वपं बिया थः लिचिले फइमखु धयादिल ।

लिसें वय्कलं पूर्खां थःगु हि–चःति हायेकाः धस्वाका थकूगु ऐतिहासिक, कला, सम्पदा, व धरोहरया रक्षा नापं नेवाःतय् हक अधिकारया निंतिं देय् दबुलिं प्रभावकारी भूमिका म्हितेमाःगु खँय् बः बियादिल । ज्याझ्वलय् ज्याःजंक्व क्वचाःपिं समाजया नीछम्ह ज्येष्ठ नागरिकयात नं सम्मान याःगु खःसा वंगु शैक्षिक सत्रय् एसइइनिसें विद्यावारिधि यानादीपिं समाजया ग्वीम्ह विद्यार्थीयात शैक्षिक सम्मान याःगु खः ।

थुकथं हे समाजयात आर्थिक नापं भौतिक ग्वाहालि यानादीपिं दातायात नं मूपाहां ताम्रकारं सम्मान यानादीगु खःसा समाजपाखें दँय्दसं बिया वयाच्वंगु उग्रचण्डी सम्मान सिरपाः थुगुसी शारीरिक सुगठन कासाया माध्यमं ताम्रकार समाजया नां च्वन्ह्याकेत सफल सागर ताम्राकारयात झिद्वः तका दांलिसें सम्मान याःगु खः ।

तःमुँज्याया निगूगु शत्रय् महासचिव शम्भुगोविन्द ताम्रकारं वार्षिक प्रतिवेदन व कोषाध्यक्ष दिपेश ताम्रकारं आय व्यय विवरण न्ह्याब्वयादीगु खःसा समाजया उपाध्यक्ष विनोद ताम्रकार, सम्मानित व्यक्तित्व सागर ताम्रकार लगायतया थीथी वक्तातय्सं नं नुगःखँ तयादीगु खः । ज्याझ्वलय् समाजया थःगु हे मोबाइल एप्लिकेशनया नं औपचारिक शुरुवात याःगु खः ।