असार ४ गते माइतीघरय् वृहत् प्रदर्शन

येँ – गुथि विधेयक विरुद्धया प्रदर्शन तचाः जुजुं वनाः देय्न्यंकं विस्तार जुया वंगु दु । थ्वहे झ्वलय् वइगु असार ४ गते माइतीघर मण्डलाय् जुइगु वृहत् प्रदर्शन जुइगु जूगु दु । उगु प्रदर्शनय् तःजिक ब्वति कायेत नं सकसितं आह्वान याःगु दु । नेवाः न्ह्यलुवापिं मल्ल के. सुन्दर, डा. महेशमान श्रेष्ठ, डा. चुन्दा वज्राचार्य, पवित्र वज्राचार्य, राजभाइ जकःमि आदिपिनि दथुइ म्हिगः जूगु मुँज्यां गुथि विरुद्धया आन्दोलनयात एकीकृत रूपं न्ह्याकेत न‌ं इनाप याःगु दु ।

नेवाः मुस्लिम समाजया विरोध ः

उकथं हे विधेयक विरुद्ध म्हिगः येँया वंघलय् नं प्रदर्शन जुल । नेवाः मुस्लिम समाजं प्लेकार्ड ब्वयाः याःगु ब्वज्या लिपा जूगु सभाय् नेवाः देय् दबूया नायः नरेश ताम्राकार, विवेकशील पार्टीया सांसद विराजभक्त श्रेष्ठ, मुस्लिम संघया वरिष्ठ उपाध्यक्ष निजाम उद्दिनपिंसं न्ववानादीगु खः ।

थीथी थासय् प्रदर्शन
विधेयक विरुद्ध म्हीग येँया धल्कोय् नं थीथी जातीय पुचःतय्सं प्रदर्शन याःगु दु। अथे हे म्हिगः सुथय् येँया १५ वडाय् नं नेवाः देय् दबू १५ वडा कचां छगू प्रदर्शन याःगु दु । १५ वडाय् नेवाः खलःपाखें नं थौं न्हिनय् ४ बजे डल्लु चौताराय् विरोध सभा याइगु जूगु दु ।

ज्यापु महागुथिया संघर्ष समिति ः
गुथि विधेयक विरुद्ध आन्दोलन यायेत ज्यापु महागुथि नेपाःपाखें संघर्ष समिति नीस्वंगु दु । २०१ म्ह दुजः दुगु संघर्ष समितिया संयोजक ज्यापु महागुथिया न्हापांम्ह अध्यक्ष सत्यनाराणय डंगोल च्वनादीगु दु ।

सम्बन्धित बुखँ

LEAVE YOUR COMMENTS