प्रधान–सुनार प्रकरण आः तनावपाखे

येँ -विवादय् वयाच्वंगु सरस्वती प्रधान व रुपा सुनार सम्बन्धी प्रकरणय् आः मिले जुयाः न्ह्याः वने फइगु सम्भावना मदुगु खँ धयाहःगु दु । थ्व प्रकरणय् प्रधान व सुनार पक्षया अभियन्तात नापलानाः खँ ल्हायेगु लागिं दथुइ छगू पुचलं कुतः यानाच्वंगु खः । तर उकी सुनार पक्षं नापलायेत इच्छा मक्यन । आः वयाः सुनारं सर्वोच्च हे वनाः रिट तःगु कारणं थ्व प्रकरणय् आः मिले जुयाः न्ह्याः वनेगु सम्भावना समाप्त जूगु खँ धयाहःगु दु । सुनारया मुद्दा स्वयेगु लागिं सर्वोच्च अदालतं म्हिगः न्यायाधीश तकं तोके यायेधुंकूगु दु ।

थ्वहे झ्वलय् म्हिगः प्रधानया पक्षं नं येँ जिल्ला अदालतय् रुपाया विरुद्ध मुद्दा दायर याःगु दु । रुपां गोप्य रुपं टेलिफोन टेप याःगु, थःत फँसे यायेत प्रपञ्च रचे याःगु, निषेधाज्ञाया उल्लंघन यानाः थःगु छेँय् वःगु लगायत थीथी द्वपं तयाः मुद्दा तःगु खः । थ्व मुद्दाय् आः यक्व प्रचार मयायेगु खँ प्रधान पक्षया कानून व्यवसायीतय्सं धाःगु दु ।
सुनारं ‘जिं क्वथा मालागु मखु, जिगु अधिकार मालागु खः’ धकाः ह्यास ट्याग तयाः प्रचार यानाच्वंगु खँय् नं स्थानीय मनूतय्सं ‘अधिकार मालागु खःसा राज्ययाके फ्वं हुँ’ धकाः लिसः बीगु शुरु याना हःगु दु ।

सम्बन्धित बुखँ

LEAVE YOUR COMMENTS