कन्हय् ईलोहं सिरपाः व मचा साहित्य सम्मेलन

येँ – ईलोहं प्रकाशनया ग्वसालय् निक्वःगु स्वनिगःव्यापी स्कुलस्तरीय नेपालभाषा साहित्य सम्मेलन जुइगु जूगु दु । कन्हय् जुइगु उगु सम्मेलनय् नीगू स्कुलया ७० म्ह स्वयां अप्वः विद्यार्थीतय्सं ब्वति काइगु खँ धाःगु दु । बाखं, चिनाखँ, च्वखँ विधाय् न्हाप, लिउ, लियांलिउ व हःपाः सिरपाः त्याकूपिंत ईलोहं साय्मि सिरपाः, ईलोहं निबन्ध सिरपाः व ईलोहं न्हूजः सिरपाः लःल्हाइ ।

थुकथं हे ईलोहं प्रकाशनपाखें लःल्हाना वयाच्वंगु मचा साहित्य विधाया ईलोहं ज्ञानज्योति सिरपाः थुगुसी नेपाल लिपिं पिथनातःगु झिंगुंगू भासं पिदने धुंकूगु व नीखुगू भासं अनुवाद जुइधुंकूगु नेपालभाषाया मचा उपन्यास ‘पासागुँया लोहँपाक्व’या च्वमि धीरजनाथ अमात्ययात लःल्हाइगु जूगु दुसा ईलोहं एल्भीस जोशी सिरपाः बाल साहित्यकार प्रेम के. निडरयात लःल्हाइगु जूगु दु ।