माओवादीं त्वःतल पहिचान मुद्दा

येँ (नेपालभाषा टाइम्स)÷अन्ततः प्रदेश नं. १ या नां नं पहिचानयात त्वःताः ‘कोशी प्रदेश’ तयेत उगु प्रदेशसभा सहमत जूगु दु । म्हिगः प्रदेशया नां तयेगु लागिं च्वंगु प्रदेश सभाया बैठकं पहिचान पक्षयात त्वःताः प्रदेशया नां ‘कोशी’ तयेत बहुमतं निर्णय याःगु खः ।
प्रदेशया नां कोशी तयेगु खँय् नेकपा माओवादी केन्द्र नं सहमत जूगु खः । प्रदेशया नां कोशी तयेगु प्रस्तावय् मत बियाः अन्ततः माओवादी केन्द्रं नं पहिचानया मुद्दायात औपचारिक रुपं त्याग याःगु दु ।

प्रदेशया नां ‘कोशी’ तयेगु धकाः एमालेया सांसद राम राना मगरं प्रस्ताव तयादीगु खः । एमालेया उगु प्रस्तावय् नेपाली कांग्रेस व माओवादी केन्द्रं नं सहमति क्यंगु खः । एमालेया प्रस्तावय् कांग्रेस व माओवादीया नं सहमति दयेवं उकियात ध्वनि मतं हे पारित याना छ्वःगु खः ।

उकिया विपक्षय् नेकपा एकीकृत समाजवादीं पहिचानय् आधारित ‘किराँत लिम्बुवान सगरमाथा’ प्रदेश नां तयेगु धकाः प्रस्ताव याःगु खः । उकी धाःसा जसपा छगू पार्टीया जक समर्थन दत ।

सदनय् थःगु बिचाः तयेगु झ्वलय् जसपाया नेता लिसें प्रदेश सरकारया स्वास्थ्यमन्त्री निर्मला लिम्बुं ख्वयाः खँ तयादीगु खः । पहिचान विरोधीतय्सं बहुमतया बल क्यनाः पहिचानया मुद्दायात परािजत याःगु द्वपं वय्कलं बियादिल । थ्व प्रस्ताव बारे थःत छुं नं जानकारी मबिउ धासें वय्कलं धयादिल, ‘खुसि व पहाडतय्सं पहिचान माग याःगु मखु । पहिचान वहे खुसि बचे याइपिं जनतां माग याःगु खः । तर जनतायात पहिचान मबिउ ।’

थ्व स्वयां न्ह्यः न्ह्याबलें नं पहिचानया पक्षय् सः तया वयाच्वंगु नेकपा माओवादीं ‘कोशी’ प्रदेशया पक्षय् मत बीगु निर्णय यायेवं उकिया हे पक्षय् स्पष्ट बहुमत खाः वंगु खः । माओवादीया सांसदतय्सं वंगु चुनावय् पहिचान पक्षधरतय्त कम जक भोट वःगु धासें आःया पालय् प्रदेशया नां तयेगु ज्याय् थःपिं बाधक जुइ मखु धइगु तायेकाः ‘कोशी’ प्रदेशय् मत तयागु खः धकाः लिसः बिउगु दु । पहिचानया पक्ष व विपक्षय् आः तक फुक्क हे पार्टीत थःथःगु पूर्व अडानय् कायम जुयाच्वंगु दनिसा थःत पक्काम्ह पहिचानवादी धाइगु पार्टीं पहिचानया मुद्दा त्वःताः मत बीगु ज्या याःगु खः ।
प्रदेशया नां तयेगु सवालय् सांसदतय्सं न्ववाःगु खँ सर्वसाधारणं सी धकाः म्हिगःया संसद बैठक लाइभ प्रशारण नं मयाःगु खः ।

विरोध प्रदर्शनया तयारी
राई, लिम्बू आदि किराँत समुदायया बाहुल्यता दुगु प्रदेशया नां थुकी मध्ये छुं हे जातिया पहिचानलिसे मस्वासे तःगु खँयात कयाः उगु लागाय् विरोध प्रदर्शन जुइगु सम्भावना ब्वलंगु दु । प्रदेशया नां तयेवं सतकय् प्रदर्शन जुइ धकाः म्हिगः प्रदेश राजधानी विराटनगर लगायत थीथी नगरय् सुरक्षा व्यवस्था कडा याःगु दु । लिसें विराटनगरय् विरोध प्रदर्शन निषेध जुइ धकाः म्हिगः हे सुचं जारी याःगु दु ।

सम्बन्धित बुखँ

LEAVE YOUR COMMENTS