तमकःद्यःया जग्गाय् सहकार्य यायेत मनपा तयार

यल (नेपालभाषा टाइम्स)- यलया ताम्रकारपिनि कुलद्यः कथं नालातःम्ह तमकःद्यः (उग्रचण्डी माई) लिसे स्वाःगु जावलाख्यःया मोसिंख्यःया चौरय् आः ताम्रकार समाजलिसे हे जानाः सहकार्य याना वनेत यल महानगरपालिका तयार जूगु दु । म्हिगः यल मनपाया ज्याकुथी जूगु निगू पक्षीय बैठकय् थ्व सहमति जूगु खः ।

तमकःद्यःलिसे स्वापू दुगु उगु जग्गाय् पार्क दयेकेगु धासें बुधवाः वडा कार्यालयं अन डोजर चले यायेवं बिहीवाः स्थानीय जनतां उकिया विरुद्ध प्रदर्शन याःगु खः । सांस्कृतिक लागा कब्जा याये दइ मखु धकाः च्वयातःगु ब्यानर सहित मनपाया ज्याकू पिने याःगु उगु प्रदर्शन लिपा मनपा व वडा कार्यालय लिचिउगु खः । स्थानीय जनतां मनपां डोजर चले यानाः नियन्त्रणय् कायेत्यंगु उगु जग्गाय् तकं वनाः ब्यानर तया बिउगु खः ।

थ्व झ्वलय् म्हिगः मनपा ज्याकुथी मेयर चिरिबाबु महर्जन सहित च्वंगु मुँज्यां उगु थासय् मनपां ताम्रकार समाजलिसे हे जानाः ज्या यायेगु धकाः सहमति याःगु खः । अन मनपां पार्क दयेकेगु प्रस्ताव हयाच्वंगु दुसा ताम्रकार समाजं अनया सांस्कृतिक संरचना मस्यंक पार्क दयेकूसां जिउ धकाः सहमति बिउगु दु । समाजया पदाधिकारी रविन्द्र ताम्रकारं कनादी कथं उगु थासय् १३० दँ पुलांगु जःरुं समेत दुगु जुयाः थ्व संस्कृतिलिसे स्वापू दुगु थाय् धइगु सीदु ।

म्हिगःया मुँज्याय् मेयर महर्जनलिसें ४ वडाया वडाध्यक्ष सन्तोष खड्का व ताम्रकार समाजया पुलांम्ह नायः अच्युतकृष्ण ताम्रकार लगायतपिंसं ब्वति कयादीगु खः ।