ने. सं. ११४४ ञलाथ्व नवमी -

राष्ट्रपतिया चुनावं झन तनाव ब्वलंकल

येँ (नेपालभाषा टाइम्स)- राष्ट्रपतिया उम्मेदवारयात कयाः प्रधानमन्त्री लिसें माओवादी केन्द्रया अध्यक्ष पुष्पकमल दाहाल व एमाले अध्यक्ष केपी शर्मा ओली निम्ह थःगु अडानं लिमचिउगु खँ सीदुगु दु ।

म्हिगः प्रधानमन्त्री दाहालयात नापलायेत अध्यक्ष ओली दाहाल निवास बालुवाटारय् वंगु खः । निम्हेसिया दथुइ जूगु खँल्हाबल्हाया झ्वलय् अध्यक्ष ओलीं पुलांगु सहमति कथं राष्ट्रपति एमालेयात बीमाःगु धासें उकिया नितिं माओवादीं केन्द्रं राष्ट्रिय सहमति दयेकेमाःगु खँ धाःगु खः ।

लिसलय् प्रधानमन्त्री दाहालं माओवादी केन्द्र, एमाले वा मेगु गुगुं दल स्वयां नं गुगु दलया बारे सहमति जुइ उकी सहलह यानाः न्ह्याःवंसां बांलाइगु खँ धयादीगु खः । लिसलय् अध्यक्ष ओलीं पुस १० गते जूगु सहमति लुमंका बिउगु खः ।

प्रधानमन्त्री दाहाल लिसें खँ ल्हायेगु झ्वलय् अध्यक्ष ओली गठबन्धन त्वाःथलेत व सत्ता समीकरण हिलेत थीथी कथंया चलखेल जुयाच्वंगु धासें कांग्रेसया नेतातय्सं बियाच्वंगु अभिव्यक्तिं देशय् अस्थिरता न्यंकेफइगु धासें सचेत जुइत इनाप यानादीगु खः । लिसलय् प्रम दाहालं वर्तमान गठबन्धन त्वाःमथलेगु थःगु कुतः जुइ धयादीगु खः । प्रम दाहालं अध्यक्ष ओलीयात धयादिल, ‘षडयन्त्र जुयाच्वंगु दु, उकी जि सचेत दु, तर थुकी एमालें नं जितः पूर्ण ग्वाहालि यायेमाः ।’

छुं न्हि न्ह्यवंनिसें एमालेया अध्यक्ष शर्मा वर्तमान सत्ता गठबन्धन मदयेफइगु खँ धायेगु यानाच्वंगु दु । वय्कलं पार्टीया विद्यार्थी संगठन अनेरास्ववियुया महाधिवेशन उलेज्या यायेगु झ्वलय् सत्ता गठबन्धन मदये फइगु खँ धयादीगु खःसा उकिया नितिं तयार जुयाः च्वनेत नं निर्देशन बियादीगु खः ।

थ्वहे झ्वलय् उपप्रधान लिसें भौतिक पूर्वाधार तथा यातायात मन्त्री नारायणकाजी श्रेष्ठं राष्ट्रपति निर्वाचनय् प्रमुख विपक्षी दल कांग्रेसयात नं विश्वासय् कयाः न्ह्याःवनेमाःगु खँ धयादीगु दु । वय्कलं म्हिगः सुर्खेतय् सञ्चारकर्मीतलिसे खँ ल्हायेगु झ्वलय् राष्ट्रिय सहमतिया आवश्यकता दुगुलिं प्रमुख विपक्षीयात नं सम्बोधन यायेमाःगु खँ धयादीगु खः । सरकारयात वःगु राष्ट्रिय सहमतिया अवस्थायात निरन्तरता बीमाःगु खँ धयादीगु खः ।

उकथं हे एमाले सचिव लेखराज भट्टं सत्ता गठबन्धनय् जूगु सहमति कथं हे राष्ट्रपति ल्ययेगु खँ धयादीगु दु । म्हिगः कैलालीइ जूगु पत्रकार सम्मेलनय् भट्टं उगु खँ धयादीगु खः । एमालें फुकसित मान्य जुइ कथं राष्ट्रपतिइ उम्मेदवार बीगु खँ धासें धयादिल, ‘पार्टीं फुकसित मान्य जुइकथं उपयुक्त उम्मेदवार थनेगु जुइ, गठबन्धन कायम जुइ ।’