पचलि प्याखंया ग्वय्दां तइगु

येँ (नेपालभाषा टाइम्स)÷थुगुसी श्री पचलि भैरवया झिंनिदँय् छक्वः जक पिहां वइगु खड्ग सिद्धि जात्रा (गथु प्याखं) पिकाइगु जूगु दु । थ्व प्याखंया लागिं आवश्यक तयारी जुइधुंकूगु दुसां उकिया औपचारिक आरम्भ धाःसा कन्हय् एकादशि कुन्हुंनिसें जुइगु जूगु दु ।

थ्व प्याखं पिकायेगु लागिं कन्हय् कामिका एकादशि कुन्हु हनुमानध्वाखाय् ग्वय्दां तयेगु ज्या जुइत्यंगु दु । ग्वय्दां तयेगु धकाः हनुमानध्वाखाय् वनाः अन तयातःगु खड्गय् पुज्यानाः ग्वय्दां तइगु खः । थुकिया लागिं कन्हय् सुथय् थनया ज्याबहालय् च्वंगु द्यःछेँ (वडा नंं. २१ वडाया ज्याकू दुगु छेँ) य् मुनाः अनंनिसें बाजं थानाः ग्वय्दां तः वनेगु तयारी जुयाच्वंगु दु । ग्वय्दां तयेधुंकल कि प्याखं पिहां वइगु निश्चित जुइ ।

वयांलि गथांमुगःनिसें पचलीइ हे प्याखं स्यनेगु ज्या जुइ । थ्व प्याखनय् मोहनि कुन्हु जुजुलिसे खड्ग हिले माःगु परम्परा दु ।