नेवाः इंग्लिस स्कूल थेच्वया झिंन्हय्क्वःगु अभिभावक दिवस हन

यल (नेपालभाषा टाइम्स)- नेवाः इंग्लिस स्कूल, थेच्वया झिंन्हय्क्वःगु अभिभावक दिवस व सिरपाः लःल्हायेगु ज्याझ्वः वंगु शनिवाः जुल । विद्यालय व्यवस्थापन समितिया ज्येष्ठ दुजः नानीनन्द गोपलीया सभापतित्वय् जूगु ज्याझ्वलय् गोदावरी नगरपालिकाया प्रमुख गजेन्द्र महर्जन मूपाहाँ व उपप्रमुख मुना अधिकारी विशेष पाहाँ कथं झायादीगु खः ।

कोरोनाया कारणं स्वदँ तक ज्याझ्वः यायेमखंगुलिं उगु इलय् हरेक कक्षा न्हाप, लिउ व लियांलिउ लाःपिंत सिरपाः लःल्हाःगु खः । थ्व स्कुलपाखें वि.सं. २०७८ या एइई परीक्षाय् यलया दक्षिण भेगया स्कुलत मध्ये सर्वोकृष्ट लिच्वः हयेत ताःलाःगु खः । उगु इलय् स्कुलया न्हापांगु ब्याचं एसइई परीक्षा बिउगु खः । ज्याझ्वलय् एकाउन्ट विषयय् सकलें विद्यार्थीतय्सं ए प्लस लिच्वः हःगुलिं उगु विषयया शिक्षक विकास जंग खड्कायात मूपाहाँ पाखें विशेष सम्मान नं लःल्हाःगु खः ।

ज्याझ्वलय् महानगरीय प्रहरी वृत्त चापागाउँया प्रमुख कृष्ण चन्द, गोदावरी नपा १२ वडाया अध्यक्ष जगतबहादुर महर्जन, दुजःपिं अशेष महर्जन, शोभा कार्की, नेवाः वस्ती नेवाः स्कुल अभियानया संयोजक दीपक तुलाधर, नेवाः देय् दबू स्वनिगः विशेष प्रदेश अध्यक्ष कृष्ण महर्जन, नेपालभाषा मंकाः खलःया अध्यक्ष हिराकाजी महर्जन, यल प्याब्सनया अध्यक्ष निरोज महर्जन, विद्यालय व्यवस्थापन समितिया दुजःपिं कृष्णकाजी महर्जन, बसन्त माली, अनुप कुमार महर्जन, पूर्ण महर्जन, पेजथ्री बाःछिपौया सम्पादक दर्शनवीर शाक्यपिं पाहाँ कथं झायादीगु खः ।