‘तिबः द सपोर्ट’या न्हूगु अभियान

येँ (नेपालभाषा टाइम्स)- नेपालभाषाया न्हूगु संकिपा ‘तिबः द सपोर्ट’ शनिवाः विश्वज्योति हल लगायत थीथी हलय् क्यनेज्या जूगु दु । थुगु संकिपाया प्रिमियर शो नं जुइधुंकूगु दु । उगु प्रिमियर शो स्वयेत संकिपा कलाकार, प्राविधिक, निर्माता, निर्देशकलगायतपिंसं तकं टिकट हे न्यानाः संकिपा स्वःगु खः । नेवाः फिल्म पास कयः सितिकं स्वयेगु मखुकि टिकट न्यानाः हे स्वयेगु याये धयागु भावना ब्वलंकेत न्हूगु अभियान कथं थःपिंसं नं टिकट हे न्यानाः फिल्म स्वयागु खँ फिल्मया निर्देशक रवि साय्मिं धयादिल ।

फिल्मयात कयाः वंगु बिहिवाः जूगु पत्रकार सम्मेलनय् वय्कलं थःपिनि न्हूगु अभियान बारे धयादीगु खः । उगु पत्रकार सम्मेलनय् पत्रकारपिनिगु न्ह्यसःया लिसः बीगु झ्वलय् निर्देशक साय्मिं नेवाः प्याखंया इतिहास हिलेगु कुतः यायेगु तातुनां आवंनिसें नेवाः प्याखं स्वयेत पासया व्यवस्था हे खारेज यायेगु योजना न्ह्याकागु जूगुलिं सकस्यां टिकट न्यानाः हे संकिपा स्वयाः नेपालभाषाया संकिपायात ग्वाहालि यायेत इनाप यानादिल ।

संकिपाया निर्माता र्सजु रंजितं प्याखं निर्माणया इलय् छुं कथंया कञ्जुस्याइँ मयानागु व फिल्म दयेकेत आवश्यक कथं थम्हं खर्च यानागु जानकारी बियादिसें वय्कलं संकिपायात माया यानाः स्वयादिया तिबःयात तिबः बीत यानादीत इनाप यानादिल ।

नेपालभाषाया नांजाःपिं कलाकारपिं आशाकाजी थकू, सुशील राजोपाध्याय, सरस्वती मानन्धर, संघरत्न शाक्य, कृष्णभक्त महर्जन लिसें लिसें न्हूपिं कलाकारपिं दुथ्याकाः दयेकातःगु थुगु संकिपाया छायाँकन अमर चित्रकारं यानादीगु खःसा प्याखंया संगीत भुपेन्द्र वज्राचार्यं तयादीगु दु ।

प्याखंया क्यनेज्या वंगु शनिवाः येँया विश्वज्योति हलं न्ह्याकुगु खःसा थौं शनिवाः नं उगु हे हलय् क्यनेज्या जुइत्यंगु जानकारी बिसें निर्देशक साय्मिं याकनं किपू व यल, ख्वप लिसें ं स्वनिगः पिने क्यंवनेगु ग्वसाः दुगु खँ कनादिल ।