चीनया नक्सां मेगु तरंग

येँ (नेपालभाषा टाइम्स)- प्रधानपुष्पकमल दाहालं छुं ई न्ह्यः भारत भ्रमण यायेत्यंगु इलय् लाक्क भारतं थःगु न्हूगु संसद भवनय् अखण्ड भारतया न्हूगु नक्सा तयाः प्रमया भ्रमणयात हे अन्यौलय् लाका बिउगु खः । वय्कलं थुकियात कयाः भारतय् खँ तयेमाः धकाः सः थ्वया वःगु खःसां वय्कलं थ्व खँ भारतय् चिसलं जक तःगु द्वपं पिहां वल ।

आः प्रम दाहाल चीन भ्रमणय् वनेत्यंगु इलय् लाक्क चीनं नं उकथं हे न्हूगु नक्सा सार्वजनिक यानाः प्रम दाहालया भ्रमणयात मर्काय् लाका बिउगु दु । चीनं नकतिनि सार्वजनिक याःगु न्हूगु नक्साय् नेपाःया कालापानी व लिपुलेक नेपाः दुने हे लाकाः तयार याःगु नेपाःया न्हूगु नक्सायात वेवास्ता याःगु दु । नेपालं धायेगु याना वयाच्वंगु न्हूगु ‘चुच्चे नक्सा’ या थासय् चीनं पुलांगु हे नक्सा तयाः थःगु नक्सा सार्वजनिक याःगु खः । चीनया थ्व पलाःयात नेपाः दुने विरोध जुयाच्वंगु दु ।

चीनं सार्वजनिक याःगु उगु नक्साय् भारतया अरुणांचल प्रदेशयात तकं थःगु दुने लाका तल धकाः भारतं नं कडानक्सां विरोध यानाच्वंगु दु । भारत व चीन दथुइ अरुणांचल प्रदेशया भूभाग गन लाः धकाः न्हापांनिसें विवाद जुयाच्वंगु खःसा आः चीनं उगु भूभाग थःगु दुने लाः धकाः औपचारिक रुपं नक्सा हे पित बियाः दावी याःगु दु । थुकिं यानाः चीन व भारत दथुइ हानं सीमा विवाद शुरु जूगु दुसा नेपाःलिसे नं चीनं समस्या पिहां वइगु अवस्था सिर्जना जूगु दु ।

तर चीनं भारतया भूभाग थःगु दुने लाकाः नक्सा जारी याःगु जूगुलिं भारतं लिपुलेक भारत दुने तयातःगु जूसां थ्व नक्सायात आधिकारिक धकाः धाये फइगु अवस्था मदु । आः याकनं चीन झायेत्यंम्ह प्रधानमन्त्री दाहालं चीन समक्ष थ्व न्ह्यसः थनी लाकि थनी मखु धइगु जिज्ञासा पिहां वःगु दु ।

थ्वहे झ्वलय् येँ महानगरपालिकाया मेयर बालेन साहं चीनं जारी याःगु न्हूगु नक्साय् नेपाःया ‘चुच्चे नक्सा’ यात वेवास्ता याःगु धासें म्हिगः विहीवाःनिसें जुइमाःगु थःगु चीन भ्रमण रद्द याःगु दु । चीनय् जुइगु छगू ज्याझ्वलय् ब्वति कायेत मेयर साह उखे झायेत्यंगु खः । तर मनपा सूत्रं धाः कथं मेयर झायेत्यंगु ज्याझ्वलय् वास्तवय् उपमेयर तहलं जक ब्वति काःसां गाःगु खः । उकिया लागिं चीनं उपमेयर तहयात जक ब्वनापौ छ्वया हःगु खः । तर मेयर साहं अन उपमेयरयात मछ्वसे थः वनेत स्वःगु खःसा उकियात कयाः मनपा दुने विरोध नं जुयाच्वंगु खः ।