पल शाहयात ज्वनेत सर्कुलर

येँ -नाबालिग मिसायात यौन दुराचार याःगु द्वपं लानाच्वंम्ह अभिनेता पल शाहयात ज्वनेगु निंतिं प्रहरीइ सर्कुलर जूगु दु । शाह विरुद्ध वंगु बुधवाः तनहुँय् जबजस्ती यौन स्वापू तःगु जाहेरी लाःगु खः । थ्व जाहेरी लायेवं सुलाच्वंम्ह शाहयात ज्वनेगु निंतिं प्रहरी सक्रिय जूगु खँ धाःगु दु ।

प्रहरी प्रवक्ता एसएसपी विष्णुकुमारी केसीं पलयात मालेगु निंतिं फुक्क प्रहरी कार्यालयय् निर्देशन वनेधुंकूगु खँ धयादीगु दु । झिंन्हय्दँ दुम्ह छम्ह गायिकां दछि न्ह्यवनिसें थःत ह्ययेकाः शाहं यौन स्वापू तयाच्वंगु द्वपं बियाः उजुरी तःगु खः ।

दछि न्ह्यः छगू म्युजिक भिडियोया सुटिङ्गया झ्वलय् नापलाःम्ह शाहं थःत तःक्वःगु बलात्कार यायेधुंकूगु द्वपं उम्ह गायिकां बिउगु खः । गायिका थ्वयां न्ह्यः हे उजुरी बीत प्रहरी वंगु खःसां शाहं थःम्हं हे ब्याहा यायेगु धकाः ह्ययेकाः उजुरी तयेके मबिउगु खः । तर लिपा हाकनं शाहं वास्ता मयायेवं उम्ह गायिकां उजुरी बिउगु खः । शाहं उजुरी मतयेगु निंतिं उम्ह मिसायात ह्ययेकाच्वंगु अडियो टेप नं सार्वजनिक जुइधुंकूगु दु ।

पलया न्हूगु फिल्म म यस्तो गीत गाउँछु २ नकतिनि रिलिज जूगु दु ।