थिमिइ नवदुर्गा प्याखं क्यनीगु

येँ – मध्यपुर थिमि लागाय् छगू दशक लिपा ख्वपया धार्मिक व सांस्कृतिक नवदुर्गा प्याखं क्यनीगु जूगु दु । वंगु झिदँ न्ह्यःनिसें ख्वपया नवदुर्गा प्याखं क्यनेगु बन्द जुयाच्वंगु थिमिइ थुगुसी निर्वाचित जनप्रतिनिधिया कुतलय् उगु प्याखं क्यनेत्यंगु खः । मध्यपुर थिमि नगरपालिकाया प्रमुख मदनसुन्दर श्रेष्ठ व वडा नं. ४या वडाअध्यक्ष कुमार श्रेष्ठया विशेष पहलय् थुगुसीनिसें हाकनं नवदुर्गा प्याखं क्यनेत्यंगु खः ।

ख्वपया ऐतिहासिक, धार्मिक व सांस्कृतिक महत्वया नवदुर्गा प्याखं येँ लगायत थीथी नीछगू थासय् क्यनेगु यानावयाच्वंगु थ्व प्याखं मध्यपुर थिमिइ थ्व हे वइगु थिंलाथ्व पुन्हि (यःमरिपुन्हि) निसें छवाःयंकं क्यनी । नवदुर्गा जात्रा व्यवस्थापन समितिया सचिव रत्नमान वनमालां वंगु झिदँ न्ह्यःनिसें थिमिइ क्यनेगु बन्द जुयाच्वंगु नवदुर्गा प्याखं थुगुसीनिसें क्यनेगु निंतिं तयारी जुयाच्वंगु खँ कनादिल ।

वय्कलं मध्यपुर थिमि नपाया प्रमुख श्रेष्ठ व ४ नं. वडाअध्यक्ष श्रेष्ठलिसें जूगु सहमति लिपा थःपिं प्याखं क्यं वनेत तयार जूगु खँ कनादीगु दु । निगू पक्षया दथुइ निगू बुँदाय् सहमति जूगु खः । थनिं छगू दशक न्ह्यः प्याखं क्यनाच्वंगु इलय् स्थानीयवासीतय्सं अय्लाः त्वनाः देवगणयात ज्यादति याःगु धासें दथुइ हे जात्रा दिका नवदुर्गा द्यःप्याखं लिहां वयेवं उगु इलंनिसें थिमिइ प्याखं क्यनेगु ज्या दिनाच्वंगु खः ।

समितिया सचिव वनमालां कनादीकथं नवदुर्गा प्याखं क्यनेत निगू पक्षया दथुइ थीथी चरणय् सहलह यायेधुंकाः न्हय्न्हुतक प्याखं क्यनेगु निंतिं सहमति जूगु खः । वय्कलंं द्यःगंछियात च्वनेगु व नयेगु व्यवस्था नापं पारिश्रमिककथं न्यागू लचा तका दां नं थःपिंसं माग यानागु कनादिल ।

थिमिइ नवदुर्गा द्यःगंछिं यानाः पीम्हतक दइगु व छवाः तक अन हे च्वनेमाःगु जुइ ।यःमरिपुन्हिकुन्हु थिमिया बालकुमारि प्याखं क्यनेधुंकाः वयां लिपा चपाच्व, नगदेश, बोडे, दधिकोट व गाम्चाय् नं थ्व प्याखं क्यं वनेमाःगु परम्परा दु ।

सम्बन्धित बुखँ

LEAVE YOUR COMMENTS