भारतीय चित्रकारतय् मिखाय् स्वनिगः
‘धाथें नेपाः वयाबलय् मेगु हे संसारय् वयागु थें च्वन’, भारतया महारष्ट्राया अब्बल चित्रकार कुडलया हिरेमठं यल लाय्कुलिइ च्वंगु कलाकौशलयात स्वस्वं थःगु अनुभूति इनादिल । वंगु शुक्रवाः पशुपति व स्वयम्भू महाचैत्य लागा चाःहिलाः उकिया लुयात क्यानभासय् कियादीम्ह वय्कःया निंतिं नेपाः तसकं हे न्ह्यइपुसे व यइपुसे नापं चित्रात्मक जू ।
प्यागोडा व शिखरशैलीया नेपाःया पुरातात्विक महत्वं जाःगु संरचनां वय्कःया छवाःया निंतिं मखु, लछितक हे थन च्वनाः ज्या यानाच्वने ला धइथें दयेका बिउगु दु । ‘नेपालय् बांलाकःगु संरचना गाक्कं दु, भारतय् थुलि तजायेक नं दइमखु, त्रिभुजाकार नं दइमखु, नेपाःया थःगु हे पहिचान खः, थुकिं थःत साला काल, जिगु मन हे लोभी जुयाबिल’ हिरेमठं धयादिल ।
वय्कः भारतया चित्रकारतय् नेतृत्व यानाः नेपाः वःगु खः । वंगु शनिवाः भारतया मेपिं झिंनिम्ह चित्रकारं नं क्यान्भासय् यल लाय्कू लागाया दृश्यत कियाच्वंगु खः । मेम्ह भारतीय चित्रकार विक्रान्त सिटोलें नं नेपाःया दृष्यत बिस्कंकथंया थःगु हे मौलिकताय् आधारित जूगु धयादिल ।
सिटोलें नेपाःया वर्णन यासें धयादिल, ‘ गनं गनं भारत व चीनया मिश्रित जूगु थेंज्याःगु नं, अले थःगु हे कथंया खने दुगु तसकं तसकं हे बांलाःगु ।’चित्रकारतय्गु संस्था ‘भारत संस्कार’पाखें चित्रकला अध्ययनया निंतिं धकाः वःपिं इमिगु छगू पुचलं वंगु छुं दिं न्ह्यवंनिसें येँया मौलिक व पुरातात्विक क्षेत्रया भ्रमण यानाच्वंगु दु ।
इपिं थन च्वनाः जलरंगपाखें थःपिंसं खंगु लुयात क्यान्भासय् कियाच्वंगु दु । स्वयम्भू, पशुपतिलिपा नगरकोट, ख्वप, यलया थीथी थासय् नं भ्रमणय् वनेगु इमिगु योजना दु । ललितकलाया माध्यमं भारतय् उगु पुचलं हरेक वालय् चित्रकला कार्यशाला (कक्षा) संचालन याना वयाच्वंगु दु । भारतय्जक अभिया न्ह्याका वयाच्वंपिं चित्रकारत अन्तर्राष्ट्रिय जलरंग समाज नेपाःलिसेया समन्वयय् न्हापांखुसी येँय् वःगु खः ।
यल लाय्कू लागाया चित्र कियाच्वंम्ह फारुख नगाफं भारतय् थन थेंज्याःगु पूर्वाधार मदुगु खँ न्ह्यथँसें थुकथं चित्रकला कार्यशाला यायेबलय् निगू देय्या संस्कृति कालबिल जुइगु व सम्बन्ध नं क्वातुया वनी धयादिल । ‘भारत–पाकिस्तान दथुइ विवाद तच्वया वनाच्वंगु इलय् जिमिगु थ्व कुतः बांलाःगु सम्बन्धया सन्देश बीकथंया दु, थ्व हे दकलय् तःधंगु लसताया खँ खः’, फारुखं धयादिल ।
नेपाःमि चित्रकार राजेश मानन्धरया कथं नेपाःया प्यागोडाशैली व शिखरशैलीया संरचना विश्वया निंतिं आकर्षक जू । लिच्छवीकालनिसेंया थ्व संरचना थनं भारतय् वंगु दु । भारतपाखें नं मिथिलाञ्चल क्षेत्रय् संरचना दुहां वःगु दु । उकिं थुपिं निगू देय्या भौगोलिक व राजनीतिक जक मखसे कलाया नं अन्योन्याश्रित सम्बन्ध दुगु मानन्धरं धयादिल ।
निगू देय् चाःहिलाः चित्र दयेका वयाच्वंम्ह भारतया प्रफुल्ल सावन्तं नेपाःया दृष्यं आकर्षित याःगु धासें छगू हे थासय् जक च्वनाः लछितक चित्र च्वयेत नं आपालं विषय दुगु खँ न्ह्यथनादिल । नेपाल भ्रमण वर्ष –२०२० य् २० गू लाख पर्यटक दुकायेगु लक्ष्य कयाच्वंगु इलय् थुकथंया ज्याझ्वलं नेपाःया पर्यटन प्रवद्र्धनय् ग्वाहालि जूवनीगु विश्वास नेपाल ललितकला प्रज्ञा प्रतिष्ठानया कुलपति कान्छाकुमार कर्माचार्यं कनादिल ।
प्रतिष्ठानया चित्रकला विभागया प्रमुख सुष्मा राजभण्डारीं विगतय् पर्यटन बोर्डलिसे सहयर्का यानाः चित्रकला सम्बन्धी ज्याझ्वः यानागु अनुभव न्यंकादिसें थुगुसी थीथी स्थानीय तहलिसेया सहकार्यय् ज्या जुयाच्वंगु खँ न्ह्यथनादिल । पर्यटन विकासया निंतिं कलाया विकास यायेमाः धासें वय्कलं सरकारया ध्यानाकर्षण तकं याकादिल ।
अन्तर्राष्ट्रिय जलरंग समाज (आइडब्लुएस) नेपाःया अध्यक्ष एनबी गुरुंगं कलाया कालबिल यायेगु लक्ष्यसहित भारतीय कलाकारलिसे सहकार्य यानाः कार्यशाला आयोजना यानागु धयादिल । भारतीय कलाकारतय्सं दयेकूगु चित्रयात नेपाः व भारतय् ब्वज्या यायेगु योजना दुगु नं गुरुंगं जानकारी बियादिल ।
भारतया झिंस्वम्ह कलाकारयात नेपाली चित्रकार दिपेन्द्रमान बनेपाली, डिराम पाल्पाली, डिबी राई, सुरेश स्याङ्तान राजेश मानन्धर लगायतं साथ बिया वयाच्वनादीगु दु ।
LEAVE YOUR COMMENTS