येँय् अझं ‘ह्याप्पीनेस’ दनि

येँ/ ‘विश्वन्यंकं विकासया नामय् जुयाच्वंगु गतिविधि–तय्सं स्थानीय संस्कृतियात हाथ्या बियाच्वंगु दु । यदि संस्कृति मंत धाःसा उगु देशया लसता (ह्याप्पीनेस) नं मदया वनी ।’

येँ मनपाया ब्वनाय् यँयाः जात्रा स्वयेत नेपाः झाःम्ह भूटनाया थिम्पू नगरया मेयर भाजु थिन्ले दोर्जीं थ्व बिचाः प्वंकादीगु खः । नेपाः चाःहिउ वःपिं स्वम्ह मेयर लगायत ४१ म्ह विदेशी पाहांपिंत म्हिगः चन्द्रागिरि चाःहीकेगु झ्वलय् पत्रकारतलिसे खँ ल्हासें थिम्पूया मेयर दोर्जीं थ्व बिचाः तयादीगु खः ।

थौंकन्हय् विश्वन्यंकं विकास व संस्कृतिया दथुइ प्रतिस्पर्धा जुयाच्वंगु दु धासें वय्कलं ‘ह्याप्पीनेस’ मदुगु विकास अर्थहिन खः धयादिल । येँदेय्या यँयाः जात्रा स्वयेधुंकाः थुकी सकलें मनूत प्याखं हुलाच्वंगु, बाजं थानाच्वंगु खनाबलय् येँय् अझ नं ‘ह्याप्पीनेस’ ल्यनाच्वंगु महसुस थम्हं यानागु खँ नं वय्कलं कनादिल । भाजु थिन्ले खस नेपाली भाय् नं बांलाक हे सः ।

नर्थ दिल्लीया मेयर अवतार सिंहं राजधानी येँदेय् नं दिल्ली थें हे यचुपिचु जूगु बिचाः तयादिल ।

जुजुवादीत मत्वःतूनि
राष्ट्रपति विद्यादेवी भण्डारीयात यँयाःया झ्वलय् बसन्तपुली वये न्ह्यः विरोध याये फइगु आशंकाय् ज्वंपिं मध्ये झिम्हेसित अझ नं प्रहरीं नियन्त्रणय् तयातःगु दनि । वंगु शुक्रवाः ज्वंपिं ६९ मध्ये ५८ म्हेसित शुक्रवाः बहनी त्वःतूगु खःसा छम्हेसित संघीय समाजवादी पार्टीया दबाबय् त्वःतूगु खँ सीदुगु दु । संघीय समाजवादीया कार्यकर्ता राजाराम तण्डुकारयात म्हिगः त्वःतूगु खःसा आः झिम्ह अझ नं प्रहरी हिरासतय् दनि । आः ज्वनातःपिं धाःसा फुक्कं जुजुवादी जूगु खँ धाःगु दु ।

कुनातःपिं मध्ये अनिल बस्नेत बाबा, कृष्णबहादुर खड्का, मानव सेवक, रविन्द्र कार्की, हरिनारायणप्रसाद साह, राजेश तामाङ, करमवीर बस्नेत, नारायण अर्याल, रघु राजभण्डारी व पारुहाङ कुथुली राई खः ।