कर्मचारी हडतालं सेवाग्रही कायल, स्थानीय निकायय् ज्या याकः वंपिं मनूत लिहां वये माल
येँ – सरकारं हःगु कर्मचारी समायोजन अध्यादेशया विरोधय् स्थानीय निकायया कर्मचारीतय्सं आन्दोलन यानाच्वंगुलिं ज्या काये माःपिं सर्वसाधारण जनता धाःसा कायल जूगु दु । स्थानीय निकायया कर्मचारीया आन्दोलनया कारणं न्हूगु नक्सा दर्ता, नक्सा पास यायेगु, थीथी ज्याया निंतिं माःगु सिफारिस काये मफयाः सेवाग्राहीयात समस्या जुयाच्वंगु दु ।
थनया छत्रपाटीया देवीप्रसाद पाठक छेँया नक्सा पास यायेत येँ मनपाय् वंगु खः । तर देय्न्यंकंया स्थानीय तहया कर्मचारीं आन्दोलनया कारणं ज्या मजुयाः लिहां वनेमाल । वय्कलं आन्दोलन धकाः सिउसां नं ज्या जुइ ला धकाः थः वनागु तर ज्या मजुयाः लिहां वनेमाःगु खँ कनादिल ।
छखे कर्मचारी आन्दोलन यानाच्वंगु दुसा मेखे सरकारं आन्दोलन प्रति उदासिन जूगुलिं उकिया लिच्वः सेवाग्राहीयात लानाच्वंगु खँ वय्कलं कनादिल । पाठक थें मेपिं सेवाग्राही नं उकथं हे लिहां वनेमाःगु अवस्था ब्वलनाच्वंगु दु । अथेहे मनपाय् सिफारिस कायेत वःम्ह बानेश्वरया श्यामकृष्ण श्रेष्ठं सेवा ठप्प जूगुलिं थःगु न्हिथंया ज्याय् लिच्वः लाःगु खँ कनादिल ।
स्थानीय तहया कर्मचारीया आन्दोलनया कारणं थःके नकारात्मक विचाः ब्वलंगु धासें वय्कलं कर्मचारीया कारणं जनतां दुःख सीगु उचित मजूगु बिचाः प्वंकादिल ।राज्यं नागरिकयात बीगु मौलिक हक सरकारं बी धइगु आशां न्हापा पटक पटक ज्ञापन पौ बियाः नं ध्यानाकर्षण मजूगुलिं आन्दोलनय् वनेमाःगु खँ स्थानीय तह कर्मचारी संगठनया नायः शम्भु बरालं कनादीगु दु ।
आन्दोलनलिसें सरकार लिसे कर्मचारी संगठनं पटक पटक वार्ता यायेधुंकाः नं थःपिनिगु माग संबोधन मजुयाच्वंगु खँ नं बरालं कनादिल । वार्ताया झ्वलय् थःपिनिगु माग प्रति प्रधानमन्त्री गम्भीर जूसां नं संबोधन मयाकेत पिनेया तत्वं चलखेल यानाच्वंगु द्वपं वय्कलं बियादिल । सरकारं थःपिनिगु माग सुनवाई मयाःगुलिं आः गुकथं न्ह्याः वनेगु धकाः कर्मचारीया दथुइ सहलह यानाः क्वःछीगु तयारी जुयाच्वंगु खँ नं वय्कलं कनादिल ।
विसं २०७४ या विधेयकं अस्थायी कर्मचारीयात स्थायी यायेगु विषय कार्यान्वयन मजूगुलिं उकियात मू विषय दयेकाः कर्मचारीं आन्दोलन याना वयाच्वंगु खः । स्थानीय निकायया कर्मचारीतय्सं अस्थायीयात स्थायी यायेमाःगु, कर्मचारी समायोजन व फोहोर मैला सम्बन्धी ज्या याइपिं कर्मचारीया भविष्य सुनिश्चित जुइमाःगु आदि माग तयाः आन्दोलन याना वयाच्वंगु खः ।
थ्वहे झ्वलय् येँ मनपाया मेयर विद्यासुन्दर शाक्यं कर्मचारीतय् माग प्रति थःगु समर्थन दु तर आन्दोलनया नामय् फोहोर बन्द यानाः जनतायात दुःख मबीत इनाप यानादीगु दु ।
LEAVE YOUR COMMENTS