पुस २७ या विदायात फागुन १ या काउन्टर !

येँ (नेपालभाषा टाइम्स)- पुस २७ गते पृथ्वीनारायण शाहया बुन्हि कुन्हु सार्वजनिक बिदा बियाः आलोचित जूम्ह सरकारं थौं फागुन १ गते
जनयुद्ध दिवस कुन्हु नं बिदा बियाः थः विरुद्धया आलोचनायात मत्थर यायेगु कुतः याःगु दु । फागुन १ गते माओवादीं जनयुद्ध शुरु याःगु न्हिया लुमंतिइ थौंया फागुन १ गते कुन्हु सार्वजनिक बिदा बीगु निर्णय याःगु खः ।

थ्व स्वयां न्ह्यः बागमति प्रदेशया माओवादी सरकारं प्रदेश दुने जक फागुन १ गते विदा बीगु निर्णय याःगु खः । तर प्रदेशं बिउगु विदाया निर्णय राजधानी येँ देय् लगायत स्वनिगलय् लागू जुइ मखु धइगु खँ पिहां वयेवं सरकारं म्हिगः हे निर्णय यासें देय्न्यंकं हे सार्वजनिक विदा घोषणा याःगु खः ।

माओवादी न्हापा सरकारय् दुगु इलय् नं फागुन १ गते कुन्हु सार्वजनिक बिदा बीगु कुतः याःगु खः । तर उकिया विरोध वयेवं विदा बीगु निर्णयपाखें सरकार लिचिल । थ्व पालय् बागमति प्रदेशं विदा बीगु धकाः याःगु निर्णयया कारणं संघय् समेत सरकारयात पिदा बीत दबाब लाःगु खँ सीदुगु दु ।

थ्व स्वयां न्ह्यः माओवादीया नीति व मान्यता विपरित पुस २७ गते बिदा बीगु निर्णय यायेमाःगु खः । उगु विदा राप्रपाया दबाबं यानाः बी माःगु खः । पुस २७ कुन्हु बिदा बिउगु कारणं पार्टी दुने आपालं कार्यकर्ता असन्तुष्ट जुयाच्वंगु खः । आः फागुन १ गतेया विदां कार्यकर्ता उत्साहित जुइगु जक मखुसें माओवादीं थःगु जनयुद्धकालीन ‘स्पिरिट’ त्वःतूगु मदुनि धइगु सन्देश नं वनीगु खँ धाःगु दु ।

फागुन १ गते विदा बीगु सरकारया निर्णयप्रति राप्रपां धाःसा असन्तुष्टि प्वंकूगु दु ।