स्कूल भवन तोडफोडया छानबिन

येँ – थनया १२ वडास्थित पचलीया महेन्द्र सरस्वती सेवा आधारभूत विद्यालयया निर्माणाधीन भवन स्यंकूगु खँयात सरकारी पक्षं गम्भीर रुपं काःगु खँ सीदुगु दु । सरकारी बजेटं दयेकूगु उगु भवन थथे दथुइ हे स्यंकूगु जुयाः थुकिं सरकारी सम्पत्तिया समेत नोक्सानी जूगु धासें स्कूलपाखें प्रहरीइ उजुरी तःगु खँ सीदुगु दु ।

तर प्रहरीं सुयातं ज्वंगु धाःसा मदुनि । सरकारी बजेट जूगु कारणं कन्हय् उकियात फछ्र्यौट यायेगु लागिं नं स्कूलं नोक्सानी बारे प्रहरीयात जानकारी मबिसें मगाःगु खँ नं धाःगु दु । तर अनया गुथियारतय्सं बिउगु निवेदनया आधारय् स्कूल दयेकेत्यंगु जग्गा गुथियागु जूगुलिं अन स्कुल भवन दयेके बी मते धकाः गुथि संस्थानं येँ मनपायात नं तःक्वःमछि पौ च्वःगु खँँ धाःगु दु ।

गुथि संस्थानया पौ वयेवं मनपां नं १२ वडा ज्याकुयात पौ च्वयाः स्कूल व गुथियार दथुया विवाद ज्यंकि धकाः निर्देशन बियाच्वंगु खँ सीदुगु दु । तर गुथि संस्थान व मनपाया पौ वयेधुंकाः नं स्कूलं धाःसा भवन दयेकेगु ज्यायात निरन्तरता बीवं गुथियार व सम्पदा अभियन्तातय्सं वंगु शनिवाः दयेकाच्वंगु भवन थःपिंसं हे वनाः थुना बिउगु खः ।

तर स्कूल थेंज्याःगु सार्वजनिक संस्थाया सम्पत्ति बारे सहलह यानाः जक प्रक्रियागत निर्णय यायेमाःथाय् अथे मयासे भीड मुनाः तोडफोड याःगुलिं येँ मनपां नं थुकियात ‘कानून ल्हातय् कयाः ज्या याःगु’ धइगु अर्थय् थुइकेगु खँ सीदुगु दु । स्कूल थुना बीवं प्रहरी नं वयाः उकियात छानबिन यानाच्वंगु खः । स्कूल भवन दयेकूगु जग्गा न्हापा पुखू खः धाःसां न्हापा नं स्कूलं जस्ताया ट्रस्ट दयेकाः मस्तय्त आखः ब्वंका वयाच्वंगु खँ नं धाःगु दु ।