ख्वपय् माघनिसें विद्यालय संचालन जुइगु

ख्वप (नेपालभाषा टाइम्स) – ख्वप नगरपालिका दुने संचालन जुयाच्वंगु विद्यालय थ्व हे वइगु माघ १ गतेनिसें संचालनय् वइगु जूगु दु । नगरपालिकाया नगर शिक्षा समितिया आः नकतिनि च्वंगु मुँज्यां थ्व हे वइगु माघ १ गतेनिसें नगर दुनेया विद्यालय पूर्णरुपं संचालनय् हयेगु निर्णय याःगु खः ।

थ्व स्वयां न्ह्यः ख्वप नगरपालिकां वंगु पुस १ गते नगर दुनेया सामुदाियक व निजी ख्यलं संचालन यानाच्वंगु विद्यालयया ८, ९ व १० गू तगिं जक संचालन यायेगु अनुमति बिउगु खः । नगरपालिकां बिउगु उगु अनुमति लिपा नगर दुनेया विद्यालयय् विद्यार्थीतय् भौतिक उपस्थितिइ संचालन जुया वयाच्वंगु खः । नगरपालिकाया शिक्षा समितिं याःगु निर्णयकथं आः वइगु माघ १ गतेनिसें नगर दुनेया दक्वं विद्यालयय् संचालन जुयाच्वंगु तगिं १२ गू तक हे विद्यार्थीतय् भौतिक उपस्थितिइ संचालनय् वइगु जूगु दु । समितिं विद्यालय संचालनया निर्णय न्ह्यः विद्यार्थी, अभिभावक, नगर दुने संचालन जुयाच्वंगु विद्यालय व्यवस्थापन समिति, शिक्षक व थीथी पेशागत संघसंस्थाया प्रतिनिधिलिसे सहलह याःगु खः ।

सरोकारवालालिसे जूगु सहलह लिपा प्राप्त सल्लाह, सुझावया लिधंसाय् वइगु माघ १ गतेनिसें विद्यालय पूर्ण रुपं संचालन यायेगु निर्णय याःगु खः । माघ १ गतेनिसें बालविकासनिसें तगिं १२ गू तक कक्षा संचालनया यायेत धासें विद्यालययात पत्रचार यायेगु निर्णय जूगु जानकारी बियादिसें ख्वप नगरपालिकाय प्रमुख सुनिल प्रजापतिं कोरोना संक्रमणया कारणं ताःई न्ह्यवंनिसें विद्यालय बन्द जुयाः पठनपाठनय् लानाच्वंगु प्रत्यक्ष लिच्वःयात ध्यानय् तयाः विद्यालय संचालन यायेगु निर्णय जूगु वयक्लं धयादिल ।

अभिभावकया पूर्व स्वीकृति, विद्यालय व्यवस्थापन समितिया निर्णय, पूर्वतयारी व कार्ययोजना दयेकाः विद्यालय संचालन यायेगु निर्णय जूगु नं वय्कलं धयादिल । लिसें विद्यालय संचालनया इलय् कोरोना सम्बन्धी छुं नं समस्या खने दत धाःसा आवश्यकताकथं विद्यालय पूर्ण वा आंशिक रुपं बन्द याये फइगु नं वय्कलं धयादिल ।

सम्बन्धित बुखँ

LEAVE YOUR COMMENTS