ने. सं. ११४४ ञलाथ्व नवमी -

राष्ट्रपति चुनाव न्ह्यः हे सत्ता समीकरण हिलेफु !

येँ (नेपालभाषा टाइम्स)- फागुन २५ गते जुइत्यंगु राष्ट्रपति निर्वाचन न्ह्यः हे सत्ता समीकरण हिले फइगु सम्भावना दुगु खँ सीदुगु दु । माओवादी केन्द्रया अध्यक्ष लिसें प्रधानमन्त्री पुष्पकमल दाहालं राष्ट्रपतिइ राष्ट्रिय सहमति कायम यायेगु जुइ धकाः कयाच्वंगु अडानया लिउने सत्ता समीकरणया हे रहस्य सुलाच्वंगु खँ विज्ञ सूत्रं धाःगु दु ।

सूत्रया कथं राष्ट्रपति निर्वाचन जुइ न्ह्यः हे निर्वाचनकालया पुलांगु गठबन्धन हानं लिहां वइगु प्रवल सम्भावना दु । उकिया नितिं पुलांगु गठबन्धनया दलतय् दथुइ सहलह जुयाच्वंगु दु । यदि उकथंया न्हूगु समीकरण कायम जुल धाःसा नेपाल समाजवादी पार्टीया अध्यक्ष डा. बाबुराम भट्टराईयात राष्ट्रपति दयेके फइगु खँ नं सूत्रं धाःगु दु । राजनीतिक पार्टीतय् दथुइ सकसितं स्वीकार्य जुइम्ह राष्ट्रपति माः धकाः जुयाच्वंगु लबिङय् डा. भट्टराईयात राष्ट्रपति दयेकेगु कुतः सुलाच्वंगु खँ नं सूत्रं धाःगु दु ।

राष्ट्रपति पद ल्ययेगु जिम्मा एमालेयात बिल धाःसा एमालें वर्तमान राष्ट्रपति विद्यादेवी भण्डारीयात हे हानं राष्ट्रपति दयेकेगु कुतः यानाच्वंगु संकेत खने दुगुलिं माओवादी केन्द्र आः एमालेयात राष्ट्रपति मबीगु लाइनय् वंगु खँ सूत्रं धाःगु दु । विद्यादेवी भण्डारी राष्ट्रपति जूगु इलय् पुष्पकमल दाहाल व कांग्रेसया शेरबहादुर देउवायात मछिनी कथंया भूमिका म्हितूगु जुयाः वय्कःयात छुं नं हालतय् हानं राष्ट्रपति मदयेकेगु पक्षय् प्रधानमन्त्री दाहाल वंगु खँ धाःगु दु ।

यदि पुलांगु हे गठबन्धन पुनजीर्वित जुया वल धाःसा उकियापाखें राष्ट्रपतिया रुपय् डा. बाबुराम भट्टराईयात हे न्ह्यःने यंकीगु वातावरण जुयाच्वंगु खँ सूत्रं धाःगु दु । अज्याःगु वातावरण दयेकेगु लागिं थौंकन्हय् स्वयम् डा. भट्टराई नं सक्रिय जुयाच्वंगु खँ विज्ञ सूत्रं धाःगु दु । यदि अज्याःगु वातावरण बने जुल धाःसा स्वयम् नेपाली कांग्रेसं हे वय्कःयात राष्ट्रपतिया रुपय् प्रस्तावित याइगु खँ नं धाःगु दु । सूत्रया कथं थौंकन्हय् कांग्रेसया नेतातय्सं ‘थःपिंसं प्रस्तावित यानाम्ह मनू हे राष्ट्रपति जुइ’ धकाः धायेगु यानाच्वंगुया कारण नं थ्वहे खः । प्रधानमन्त्री दाहालं विश्वासया मत काःगु इलय् उकी नेपाली कांग्रेसपाखें समेत विश्वासया मत बीकेगु लागिं प्रमुख रुपं डा. भट्टराईं हे भूमिका म्हितूगु खः ।

प्रम दाहालं म्हिगः रवि लामिछानें सरकार त्वःते धकाः ख्याच्वः बिउसां वास्ता मयाःगुया कारण थ्वहे खः धकाः नं सूत्रं धाःगु दु ।