कामपा वडा नं १५य् ४६म्हेसिया र्यापिड टेस्ट
येँ – येँ महानगरपालिका वडा नं १५पाखें शुक्रवाः ४६म्हेसिया र्यापिड डाइग्नोस्टिक टेस्ट (आरडीटी)पाखें काेराेना भाइरसया परीक्षण याःगु दु ।
उगु वडाय् नकतिनि विदेशं वःपिं मनूतय्त कोरोना भाइरसया संक्रमणया परीक्षण जूगु खः । परीक्षणय् फुक्कं ४६म्हेसिया रिपाेर्ट नेगेटिभ वःगु खः । सामुदायिक स्वास्थ्य परिषदय् जूगु परीक्षण वडा नं १५या सक्रियता व कामपाया संयोजनय् जूगु खः ।
परीक्षणया झ्वलय् फुक्कसित हौसला बीगु निंतिं कामपाया प्रवक्ता नापं वडा नं १५या अध्यक्ष ईश्वरमान डंगोलं नं कोरोनाया टेस्ट याकादीगु खः । स्वास्थ्य सेवा विभागया ईपिडिमियोलोजी तथा रोग नियन्त्रण महाशाखाया पिताम्बर पन्त, राजेन्द्र खड्का, बुद्धरत्न महर्जन, फणेन्द्र ज्ञवालि लगायतया ल्याब टेक्निसियनतपाखें परीक्षण जूगु खः ।
उगु इलय् वडा अध्यक्ष डंगोलं आः तक वडावासीतय् ग्वाहालिया कारणं वडा सुरक्षित जूगु व वइगु दिनय् नं लकडाउनया पूवंक पालना यानाः वडायात अझ सुरक्षित तयेत छेँ-छेँ च्वना लकडाउनया पालना यानाः ग्वाहालि यायेत इनाप यानादिल ।
उखे वडा नं ४ व ५य् नं ९८म्हेसिया परीक्षण जूगु खःसा फुक्कसिया रिपाेर्ट नेगेटिभ वःगु खः ।
LEAVE YOUR COMMENTS