लोकतान्त्रिक इतिहासय् हाकुगु दिं

येँ (नेपालभाषा टाइम्स) – जनता समाजवादी पार्टीया नेता राजेन्द्रप्रसाद श्रेष्ठं राष्ट्रपतिं प्रतिनिधिसभा विघटनया सिफारिस अनुमोदन याःगुलिं राष्ट्रपतिया संवैधानिक हैसियतयात कयाः हे न्ह्यसःचिं दंगु खँ धयादीगु दु ।

राष्ट्रपतिं संविधानया धारा ७६या उपधारा १ व ७ अथे हे धारा ८५या लिधंसा काःगु धाःसां नं वर्तमान अवस्थाय् उगु धारा संसद विघटनया निंतिं व्यवस्था विद्यमान मजूगु नं वय्कलं धयादीगु दु । संसद विघटनयात ‘राजनीतिक कू’ या संज्ञा बियादिसें वय्कलं राष्ट्रपति व प्रधानमन्त्री मिले जुयाः संविधानप्रति हे बलात्कार याःगु द्वपं नं बियादीगु दु । संसद विघटनया दिंयात नेपाःया लोकतान्त्रिक इतिहासय् हे हाकुगु किचः जूगु नं वय्कलं धयादिल ।

थ्व स्वयां न्ह्यः वय्कलं प्रधानमन्त्री केपी शर्मा ओलीं संसद विघटन यानाः संविधानया मर्म व भावनाया हत्या याःगु खँ धयादीगु खः । विघटित संघीय संसद सदस्य तकं जुयाच्वनादीम्ह नेता श्रेष्ठं प्रम ओलीं संविधानया मर्म व भावनाया हत्या यानाः ‘कू’ याःगु खँ धयादीगु दु । राष्ट्रपति विद्यादेवी भण्डारी समक्ष संघीय संसदया प्रतिनिधिसभा विघटन यायेत सिफारिस याःगु धइगु प्रम ओलीया प्रतिगामी पलाः जूगु धासें वय्कलं उकिया अग्रगामि परिवर्तन पक्षधर शक्तित सकलें छप्पँ जुयाः हाकनं छक्वः मंकाः आन्दोलनया न्ह्याकेमाःगु आवश्यक जूगु नं धयादीगु दु । आःया आन्दोलना मुख्य एजेन्डा प्रत्यक्ष निर्वाचित राष्ट्रपति, पूर्ण समानुपातिक संसद, पहिचानसहितया संघीयता, समानुपातिक समावेशीकरण, राष्ट्रिय स्वाधीनता, सहभागितामूलक समावेशी लोकतन्त्र जुइमाःगु वय्कलं धयादीगु दु ।

अथे हे वय्कलं आधारभूत मानवअधिकारया रक्षा, विधिया शासन, समतामूलक समृद्धि व जनजीविकाया ग्यारेन्टी व सुशासन नं आःया मुख्य एजेन्डा जुइमाःगु खँय् बः बियादीगु दु। प्रतिनिधिसभा विघटनया षडयन्त्र विरुद्ध दक्वं अग्रगामि परिवर्तनकारी शक्तित संघीय लोकतान्त्रिक गठबन्धन दयेकाः वनेमाःगु खँय् नं वय्कलं बः बियादीगु दु ।