अजिमाया द्यःया देगः पुनःनिर्माण क्वचाल

येँ (नेपालभाषा टाइम्स)- थनया सीघलय् च्वंगु हारति अजिमा द्यःया देगःया पुनःनिर्माण क्वचाःगु दु । श्रीशान्तिघट वज्रधातु चैत्य महाविहार सीघलय् विराजमान हारति अजिमाया देगः पुनःनिर्माण क्वचाःगु लसताय् छगू पुजा नं याःगु खः ।

नांजाःम्ह पर्यटन व्यवसायीलिसें महाविहार थकालि आजु कर्ण शाक्यया सभापतित्वय् जूगु ज्याझ्वलय् येँ महानगरपालिकाया उपप्रमुख सुनिता डंगोल मूपाहांकथं झायादीगु खः । मूपाहां उपप्रमुख डंगोलं बोधिमत च्याकाः उलेज्या यानादीगु ज्याझ्वलय् देगः पुनःनिर्माण क्वचाःगु लसताय् पिथंगु लुमन्ति पौया नं पितब्वज्या याःगु खः ।

मूपाहां डंगोलं थुकथं शाक्य सर्वसंघ जानाः हारति अजिमाया देगः पुनःनिर्माणया ज्या क्वचायेकूगु लसताया खँ खः धासें थुकथंया धार्मिक, सांस्कृतिक व ऐतिहासिक महत्वया सम्पदा संरक्षणया ज्याय् महानगरपालिका सदां न्ह्यचिला च्वनी धयादिल ।

देगः पुनःनिर्माण क्वचाःगु लसताय् जूगु पुजाय् श्रीशान्तिघट वज्रधातु चैत्य महाविहार संरक्षण समितिया नायःलिसें हारति अजिमा देगः पुनःनिर्माण उपभोक्ता समितिया संयोजक शुभकाजी शाक्यं ज्या शुरु जूगु दछिय दुने हे पुनःनिर्माण क्वचायेकाः पुजा याये खंगु लसताया खँ खः धयादिल ।

ज्याझ्वलय् संरक्षण समितिया लिउ दांभरिं नापं पुनःनिर्माण समितिया आर्थिक संयोजक रविन्द्र शाक्यं पुनःनिर्माणया ल्याःचाः न्ह्यब्वयादीगु खः । येँ मनपा २५ वडाया पुलांम्ह वडाअध्यक्ष नीलकाजी शाक्यया नं विशेष उपस्थिति दुगु ज्याझ्वलय् देगः पुनःनिर्माणया ज्याय् ग्वाहालि यानादीपिंत हनेज्या नं याःगु खः ।

दछि न्ह्यः माघ ३ गते देगः पियाः पुनःनिर्माणया ज्या न्ह्याकूगु खः । येँ महानगरपाकिाया तत्कालीन मेयर विद्यासुन्दर शाक्यं आर्थिक ग्वाहालि यानादीवं देगः पुनःनिर्माणया ज्या न्ह्याःगु खः ।