स्वनिगलय् ठप च्याम्ह संक्रमित

येँ – म्हिगः हाकनं नेपालय् ४७६ म्ह कोरोना भाइरसया संक्रमण जूगु पुष्टि जूगु दु । थुकिया लिसे नेपालय् संक्रमिततय् ल्याः १३२४८ म्ह थ्यंगु दु ।
मन्त्रालयया कथं कोरोना भाइरसया कारणं थप छम्ह सीगु दु । रौतहटया ३० दँ दुम्ह मिजं म्हीग यलया स्टार अस्पतालय् मदुगु खः ।

सासः ल्हायेत थाकुइवं अस्पताल यंकूम्ह उम्ह मिजंयात भेन्टिलेटरय् तयाः वासः याःगु खःसां म्हीग बहनी हे मदुगु खः । दमया ल्वगि उम्ह मिजंयात म्हीग स्वनिगःया थीथी अस्पतालय् भर्ना यायेत कुतः याःगु खःसां नं असफल जुइवं स्टार अस्पतालया आइसोलेसन कक्षय् भर्ना यानाः वासः यायेगु शुरु याःगु छुं ई लिपा मदुगु खः ।

मदुम्हेसिया स्वाब म्हीग हे संकलन यानाः यलया पाटन स्वास्थ्य विज्ञान प्रतिष्ठानय् छ्वःगु खःसा उकुन्हु हे चान्हय् कोरोना पोजिटीभया रिर्पोट वःगु खः । थुकिया लिसे नेपालय् सीपिनिगु ल्याः २९ म्ह थ्यंगु दु ।

स्वनिगलय् च्याम्ह थप
स्वास्थ्य मन्त्रालयया म्हिगः थप जूपिं संक्रमितत मध्ये स्वनिगलय् च्याम्हेसित संक्रमण खनेदुगु दु । थुपिं मध्ये येँय् खुम्ह व यल व ख्वपय् छम्ह छम्ह संक्रमित लाःगु दु ।