
येँ- उप–प्रधानमन्त्री ईश्वर पोखरेलं येँ महानगर–पालिकां आधारभूत तह (छगू तगिं निसें च्यागू तगिं) या स्थानीय विषय नेपालभाषाया माध्यमं ब्वंकेगु धकाः याःगु निर्णय अतिकं च्वछायेबहः जूगु खँ धयादीगु दु ।
नेवाः पत्रकार राष्ट्रिय दबू, येँ कचापाखें म्हिगः येँ मनपाया मेयर विद्यासुन्दर शाक्य लिसें उपमेयर हरिप्रभा खड्गी श्रेष्ठयात याःगु नागरिक अभिनन्दन ज्याझ्वलय् न्ववासें वय्कलं उगु खँ धयादीगु खः ।
नेवाःतय् भाषा, कला, संस्कृति हे नेपाःया म्हसीका खः धासें वय्कलं येँ महानगरपालिकां थ्व ज्या अझ न्हापा हे यायेमाःगु खः, आः भचा लिबाक याःसां बांलाःगु ज्या याःगुलिं उकियात सरकारया पूर्ण समर्थन दु धयादिल । अथे हे विशेष पाहां शिक्षा मन्त्री कृष्णगोपाल श्रेष्ठं येँ महानगरपालिकां ल्ह्वंगु पलाःपाखें येँ देय्या म्हसीका स्थापना यायेत अझ तिबः जू वनीगु बिचाः प्वंकादिल ।
अभिनन्दित व्यक्तित्व मेयर विद्या–सुन्दर शाक्यं येँ मनपां याःगु थ्व ज्यायात नेपाः सरकारपाखें थौं अनुमोदन प्राप्त जूगुलिं सरकारयात सुभाय् देछानादिल । वय्कलं येँ मनपां ‘येँ देय् म्हसीके’ सफू ब्वंकाः नेपालभाषा ब्वंकेत्यंगु मखुसें येँ देय्या म्हसीका जक ब्वंकेत्यंगु खः धासें येँ देय्या म्हसीका ब्वंकेगु माध्यम जक नेपालभाषा यानागु खः धकाः स्पष्ट यानादिल ।
अथे हे नेपालभाषा मंकाः खलःया नायः लिसें जनकवि दुर्गालाल श्रेष्ठं येँ महानगरपालिकां लागू याःगु भाषा सम्बन्धी थ्व व्यवस्था आः देय्या मेमेगु नगरपालिकातय्सं नं अनुशरण याना वनेमाःगु बिचाः प्वंकादिल । नेवाः पत्रकार राष्ट्रिय दबू येँ कचाया नायः अर्विन्द्रमान सिंहया सभापतित्वय् जूगु उगु ज्याझ्वलय् दबूया केन्द्रीय नायः सुरजवीर वज्राचार्यं लसकुस यानादीगु खः ।
ज्याझ्वः न्ह्यः तिंख्यःध्वाखां मेयर व उपमेयरपिंत पञ्चकन्या, थीथी बाजं, स्कुलया विद्यार्थी, खलः पुचः सहित नगर परिक्रमा याकूगु खः । बसन्तपुली जूगु समारोहय् मेयर, उपमेयर, येँ मनपा लिसें नेपालभाषाया पाठ्यक्रम निर्माण यायेगु ज्याय् ग्वाहालि याःपिंत हनापौ लःल्हाःगु खः । अथे हे ३० गू खलः पुचःतय्सं मेयर व उपमेयरयात हनापौ नं लःल्हाःगु खः ।
LEAVE YOUR COMMENTS