लोडसेडिङ्गं उदयपुर सिमेन्ट हाकनं घाटाय्

येँ – देय्या दकलय् तःधंगु सरकारी स्वामित्वय् दुगु उदयपुर सिमेन्ट उद्योग हाकनं घाटाय् वंगु दु । लोकंह्वाःगु उदयपुर सिमेन्ट उत्पादन याना वयाच्वंगु थ्व उद्योग छुं ई न्ह्यव नाफाय् वनेधुंकूगु खःसां आः हाकनं घाटा खनेदुगु खः । लोडसेडिङ्ग मजुइवं अप्वः सिमेन्ट उत्पादन यायेफुगुलिं उद्योगं नाफा कमे यायेगु सुरु याःगु खः, तर आः हाकनं उद्योग तयातःगु थाय् उदयपुरया जलजलय् लोडसेडिङ्ग सुरु जुइवं सिमेन्ट उत्पादन म्हो जुयाः घाटाय् वंगु खँ धाःगु दु ।

वंगु स्ववाः तक उद्योग लागाय् न्हि न्याक्वः धयाथें लोडसेडिङ्ग जूगु खँ उद्योगया निमित्त महाप्रबन्धक नवलकिशोर साहं राससयात धयादीगु दु । पुसया लिपांगु वाः निसें माघया निगूगु वाः दुने उद्योगं थ्यंमथ्यं स्वंगू करोड द्यापं फयेमाःगु खँ वय्कलं धयादीगु दु । लोडसेडिङ्गं यानाः सिमेन्ट उद्योगं थौंकन्हय् न्हिं ६५० मेट्रिक टन जक सिमेन्ट उत्पादन यानाच्वंगु दु । थ्वयां न्ह्यव लोडसेडिङ्ग मदुबलय् न्हि ८०० मेट्रिक टन तक सिमेन्ट उत्पादन यायेधुंकूगु खः ।

थौंकन्हय् सिरहा, लहान, गाइघाटया विद्युत लाइनय् न्हियान्हिथं धयाथें लोडसेडिङ्ग जुयाच्वंगु खँ धाःगु दु । थुकिया कारणं मेमेगु उद्योगय् नं बांमलाक लिच्वः लाःगु दु । थुकिया बारे सम्बन्धी पक्षयात धायेधुंकूसां अझं समाधान मजूनिगु खँ उद्योग प्रशासनं धाःगु दु ।

उद्योग स्थापना जुसां निसें हे द्यापं फयाच्वंगु उदयपुर सिमेन्टं दत्या न्ह्यव लोडसडिङ्ग चिइकेवं ५० करोडं मल्याक नाफा कमे यायेधुंकूगु 
खः । आः हाकनं न्हि न्याक्व धयाथें मत स्याना हयेगु यायेवं उद्योग घाटाय् वंगु खँ उद्योग प्रशासनं धाःगु दु ।

 

सम्बन्धित बुखँ

LEAVE YOUR COMMENTS