उपसभामुख पदं रास्वपाय् कचवं

येँ (नेपालभाषा टाइम्स)- सभामुख लिपा आः उपसभामुख चुनावया तयारी शुरु जूगु दु । थुकिया लागिं रास्वपापाखें इन्दिरा राना मगर व कांग्रेसपाखें मुक्ता कुमारी यादवं उम्मेदवारी दर्ता याःगु दु ।
सत्तारुढ दलतपाखें इन्दिरा रानायात हे मत बीगु जूगुलिं वय्कः हे त्याइगु निश्चित दु ।

रास्वपा दुने धाःसा उपसभामुख जुइगु खँय् कचवं पिहां वःगु खँ धाःगु दु । थ्व पदय् वयेगु लागिं निर्वाचित सांसद शोभिता गौतमं रुचि क्यनादीगु खःसां वय्कः आःया लागिं पार्टी ज्याय् हे खटे जुइ मानि धकाः वय्कःया पलेसा इन्दिरा रानायात उम्मेदवार दयेकूगु खः ।

थ्व स्वयां न्ह्यः सुमिना श्रेष्ठया नां नं चर्चाय् वःगु खःसां श्रेष्ठं धाःसा थः थ्व पदय् वने मखु धकाः सार्वजनिक रुपं हे धयादीगुलिं राना मगरयात अवसर वंगु खँ धाःगु दु । शोभिता गौतमं थ्व स्वयां न्ह्यः कानुन मन्त्री जुइगु इच्छा यानादीगु खः । तर कानुन मन्त्रालय रास्वपायात मबीगु जुइवं वय्कः मन्त्री नं जुइ मखन । आः वय्कःयात न्ह्यागुसां मेगु पदय् यंकेगु खँ जुयाच्वंगु दु ।

थ्व स्वयां न्ह्यः कांग्रेसं सभामुख पदय् नं उम्मेदवारी थंगु खः । कांग्रेसं सभामुख व उपसभामुख निगुलिं पदय् उम्मेदवारी बीगुया नापनापं आः राष्ट्रपति पदय् नं दावी यानाच्वंगु दु ।

नेपालभाषा टाइम्स

च्वमिया मेमेगु

• भाषासेवी विष्णु चित्रकार मंत, कन्हय् जगतसुन्दर ब्वनेकुथिइ अन्तिम श्रद्धाञ्जलीया निंतिं तइगु
• कुमारी छेँया त्वरं पुनर्स्थापना (भिडियाे रिपाेर्ट)
• बोस्टनय् सक्वया सम्पदाया चित्रकला ब्वज्या
• एनपीपीएया नायः पदय् शान्ति श्रेष्ठ
• समाजसेवी दिलबहादुर मानन्धर मंत