गुथि बारे खड्गी समितिया मुना

येँ – विवादास्पद गुथि विधेयक बारे सहलह यायेत नेपाल खड्गी सेवा समितिं शुक्रवाः येँय् छगू तःजिगु देमुना यात । सरकारं राष्ट्रिय सभाय् पेश यानाः नं दबाबं यानाः लिपा लित काःगु गुथि विधेयक बारे थःपिनि धारणा सार्वजनिक यायेगु ताः तयाः समितिं उगु मुना याःगु खः ।

ज्याझ्वलय् येँ महानगरपालिकाया मेयर विद्यासुन्दर शाक्यं गुथि विधेयक बारे नेवाः समाजं तयार याइगु अवधारणायात सरकार समक्ष तयाः गुथि विधेयकयात नेवाःतय् पक्षय् हयेत मनपां सहजकर्ताया भूमिका म्हिताच्वनागु खँ कनादिल । वय्कलं धयादिल, ‘गज्याःगु कानून दयेकेगु खः निर्णय छिकपिंसं यानादिसँ, सम्बन्धित थासय् यंका बीगु ज्या जिमिसं याना बी ।’

नेपाल खड्गी सेवा समितिया नायः अंजिता खड्गीया अध्यक्षताय् जूगु उगु मुनाय् समितिया संरक्षक मनोज नेवाः खड्गीं सरकारय् नेवाः मन्त्री छम्ह हे मदुगु प्रशंग न्ह्यथँसें आः नेवाःतय्सं थःगु खँ येँ महानगरपालिका मार्फत हे तया वनेगु पाय्छि जुइ धयादिल ।

लिसें वय्कलं खड्गी समुदायं चले यानाच्वंगु जात्रा पत्र सञ्चालन, गुथिछेँ निर्माण, बाजंया व्यवस्था याना बीत मनपायात इनाप नं यानादिलसा लिसलय् मेयर शाक्यं खड्गी जक मखु सुयां नं गुथिछेँ, जात्रा पर्व सञ्चालन यायेत मनपां ग्वाहालि याइ धयादिल । ज्याझ्वलय् मनपाया संस्कृति व सम्पदा समितिया संयोजक न्हुछेकाजी महर्जनं नं न्ववानादीगु खः ।