मानन्धर संघया तःमुँज्या क्वचाल
येँ (नेपालभाषा टाइम्स) – देय्न्यंकंया साय्मितय् मंकाः संस्था केन्द्रीय मानन्धर संघया निदँ दँमुज्या छक्वलं जुल । मानन्धर संघया ३५ क्वःगु व ३६ क्वःगु दँमुँज्या वंगु शनिवाः जूगु खः ।
संघया सभापति नारायणदास मानन्धरया सभापतित्वय् जूगु दँमुँज्याय् उपसभापति बद्रीनारायण मानन्धरं लसकुस यानादीगु खः । संघया सचिव गजेन्द्रमान मानन्धरं वार्षिक प्रतिवेदन व कोषाध्यक्ष राजे न्द्र मानन्धरं आयव्यय विवरण न्ह्यब्वयादीगु खः । निगुलिं प्रतिवेदन सहलह लिपा पारित याःगु खः ।
तःमुँज्यां संघया न्हूगु ज्यासना पुचः नं ल्यःगु खः । न्हूगु ज्यासना पुचलय् सभापति ल्यज्याय् विधान सम्मत जू, मजू धइगु खँय् विवाद ब्वलने वं तत्कालया निंतिं सभापति पद छगू त्वःताः ज्यासना पुचःया दुजलय् जक ल्यज्या याःगु खः । संघया विधानकथं सभापति बाहेकं मेपिं सकलें दुजलय् निर्वाचत जुइगु व लिपा ज्यासना पुचःया मुँज्या च्वनाः पदीय जिम्मेवारी बीगु खः ।
ज्यासना पुचःया दुजलय् सन्देश मानन्धर (दैसाः), बुद्ध मानन्धर (फम्पि), कृष्णकाजी मानन्धर (थिमि) राजेन्द्र मानन्धर (मच्छेगां), जगदीश मानन्धर (भिंद्यः गुथिं) गजेन्द्रप्रसाद मानन्धर (धालासिक्व), तुल्सीकाजी मानन्धर (ख्वप), राजन मानन्धर (पाक्व), विश्वराम मानन्धर
(भ्वत), कृष्णबहादुर मानन्धर (न्हूसाः), रमेश मानन्धर (किपू) व रोशन मानन्धर (थँहिति)यात ल्यःगु दु ।
संघया विधानकथं ज्यासना पुचःया मुँज्यां निम्ह दुजः लिपा मनोनित याइ । निर्वाचनया निंतिं डा. पंचकुमारी मानन्धरया संयोजकत्वय् प्रा. डा. भगवानदास मानन्धर , ई. अमर बहादुर मानन्धर , पौभाः साय्मि, कर्ण मानन्धर दुथ्याःगु निर्वाचन कमिटी गठन याःगु खः ।
LEAVE YOUR COMMENTS