गद्दी बैठक चायेकीगु

येँ (नेपालभाषा टाइम्स)÷थनया बसन्तपुली च्वंगु गद्दी बैठक आः सर्वसाधारणया निंतिं नं खुल्ला याइगु जूगु दु । तःभुखां क्षति याना बिउगु थ्व दरवार अमेरिकां जीर्णोद्धार याना बिउगु खः । हनुमानध्वाखा दरवारया मेमेगु लागा सर्वसाधारणया लागिं खुल्ला जूसां गद्दी बैठक छगू धाःसा बन्द याना तःगु खः । राणा प्रधानमन्त्री चन्द्र शमशेरया पालय् तत्कालीन बेलायती सरकारं बेलायतया शैलीं थ्व दरवार दना बिउगु खः ।
थ्व दरवारयात खास यानाः जुजुपिंसं यँयाःबलय् कुमारी सालीगु व बहनी दश अवतार स्वयेगु लागिं छ्यला वयाच्वंगु खः । मध्यकालीन दरवार लागाय् बेलायती शैलीया थ्व छगू दरवार दनातःगु बांलाः मजूगु खँ नं धायेगु याः ।
हनुमानध्वाखा दरवारया थीथी लागा सर्वसाधारणया लागिं खुल्ला जूसां गद्दी बैठक छगू धाःसा बन्द याना तःगु खःसा जीर्णोद्धार लिपा थुकियात नं खुल्ला याना छ्वयेगु तयारी पुरातत्व विभागं याःगु खः ।
तर थुकियात खाली क्वथा स्वयेगु ल्याखं जक खुल्ला मयासे छगू म्युजियम समेत दयेकाः खुल्ला यायेगु तयारी जुयाच्वंगु खँ धाःगु दु । गद्दी बैठकय् छु गज्याःगु म्युजियम तःसा जी धकाः विभागपाखें सम्बन्धित विज्ञ व उगु लागाया जनप्रतिनिधिपिंके राय सल्लाह नं कयाच्वंगु खँ सीदुगु दु । थन विशेष यानाः नेपाःया मध्यकाल व आधुनिक कालया इतिहास पिलुइ कथंया म्युजियम दयेकेगु कथं सहलह न्ह्यानाच्वंगु खँ नं सीदुगु दु ।