येँया फोहोर वाके मबीगु ख्याच्वः

येँ (नेपालभाषा टाइम्स)- येँय् सिंहदरवारया फोहोर मुना यंकेगु मखु धकाः हाथ्या बियाच्वंम्ह येँ महानगरपालिकाया मेयर बालेन साहयात सिसडोल व बञ्चरेडाँडा ल्याण्डफिल साइटया जनतां मुक्कं मनपाया हे फोहोर वाके बी मखु धकाः मेगु हाथ्या बियाहःगु दु ।

धादिङया धुनिवेशी नगरपालिका व नुवाकोटया ककनी गाउँपालिकां थगुने जेठ २३ गते जूगु सम्झौता कार्यान्वयन मयाः धासें थःथाय् फोहोर वाके मबीगु ख्याच्वः बियाहःगु खः । थ्व निगू पालिकां सहमति कार्यान्वयनया नितिं झिंन्यान्हुया अल्टिमेटम नं बिउगु दु । वंगु वैशाख ५ गते च्वंगु मंकाः मुँज्यां थ्व निर्णय याःगु खँ धाःगु दु ।

वर्गीकरण यानाः जक फोहोर वायेगु, फोहोर ढुवानीया ज्या बहनी जक यायेगु, चान्हय्या नितिं मत व सतक दयेकेगु ज्या स्वलाया दुने यायेगु धकाः थगुने जेठ २३ गते शहरी विकास मन्त्रालय, येँ मनपा, धुनीवेशी नपा व ककनी गापाया दथुइ सहमति जूगु खः ।

थ्व निगू पालिकातय्सं थ्व ज्या याकनं यायेमाःगु धासें वैज्ञानिक व आधुनिक प्रविधिया विज्ञ पुचः गठन यानाः म्हो प्रभाव लाइगु कथं फोहोरमैला व्यवस्थापन यायेमाःगु व बञ्चरेडाँडां पिहांवःगु फोहोरया लिच्चडयात कोल्पु खोलाय् ल्वाक मछ्यासे मेथाय् व्यवस्थापन यायेमाःगु लगायत न्हय्गू बुँदाया माग न्ह्यब्वःगु दु ।

निगुलिं पालिकां अति प्रभावित व प्रभावित वर्गीकरण यानाः बञ्चरेडाँडां २ किलोमिटर जीपीएस क्षेत्रया जग्गा अधिकरण यायेमाःगु व प्रभाविततय्त मुआब्जा बीगु ज्या नं तत्काल न्ह्याकेमाःगु माग याःगु दु ।

उकथं हे फोहोर व्यवस्थापन यायेगु झ्वलय् सिसडोल व बञ्चरेडाँडाय् जूगु ईआईएया प्रतिवेदन सार्वजनिक यायेमाःगु माग नं याःगु दु । निगुलिं स्थानीय तहया वडायात दँय् १० करोड दां बी माःगु व फोहोर पनेगु आन्दोलनय् मुद्दा लाःपिनि मुद्दा लित कायेमाःगु माग नं याःगु दु । थ्व अल्टिमेटमयात वास्ता मयात धाःसा थ्वहे वइगु वैशाख १५ गते लिपा फोहोर वाके मबीगु ख्याच्वः उमिसं बिउगु दु ।

सिंहदरवारय् अझं फोहोर मुं मवं
मेयर बालेन साहं सिंहदरवारया फोहोर मुने मखु धकाः सरकारयात हाथ्या बिउगु कारणं सरकार समर्थित राजनीतिक पार्टीतय्सं हे बालेन साहयात ‘काउन्टर’ बी कथं थ्व हाथ्या बिया हःगु अनुमान याःगु दु । साहं सिंहदरवारय् फोहोर मुंके मछ्वःगु कारणं यानाः थौंकन्हय् सिंहदरवारय् फोहोर द्वँचिनाच्वंगु दुसा उकिं यानाः अन दुर्गन्ध अप्वयाच्वंगु दु ।

महानगरपालिकां फोहोर मुंके मछ्वःगु कारणं यानाः आः सिंहदरवारय् मुनीगु फोहोरयात अन हे च्याकेगु व ल्हाकेगु यासें व्यवस्थापन याना छ्वयेगु तयारी जुयाच्वंगु दु । मनपाया उगु पलाः लिपा सरकारं मेयर साहलिसे वार्ता यायेगु धकाः प्रस्ताव छ्वःसां साहं गृह मन्त्री वइगु खःसा जक वार्ताय् च्वने धकाः लिसः बिया छ्वःगु खँ धाःगु दु । मनपाया थ्व पलाःया विरुद्ध सर्वोच्च अदालतय् रिट नं दर्ता जुइधुंकूगु दु ।