न्हापांम्ह विद्यार्थी शहीद तुलाधरयात लुमंकल

येँ – वि.सं. २००८ सालया विद्यार्थी आन्दोलनय् प्रहरीया गोलीं कयाः मदुम्ह ङत तुलाधर क्वाथ्च्व कवःया काय्मचा व दकले न्हापांम्ह विद्यार्थी शहीद चिनि काजि तुलाधरयात ङत तुलाधर समितिं लुमंकल । समितिया नायः संसारधर तुलाधरया सभापतित्वय् जूगु लुमंति ज्याझ्वलय् शहीद चिनि काजि तुलाधरया कान्छाम्ह किजा अमरकाजि तुलाधर मूपाहां कथं झाःगु खः ।

ज्याझ्वलय् समितिया मू छ्यांज्ये पूर्ण रत्न तुलाधर, छ्यांज्ये ज्ञानेन्द्र रत्न तुलाधर, किलागः कवःया थाकुलि सागरमान तुलाधर लिसें चिनि काजिया कान्छाम्ह किजा अमर काजिं नेपाःया विद्यार्थी आन्दोलनय् वयकःया योगदान बारे चर्चा यानादिसें मेट्रिक जाँचया तयारी यानाच्वंगु इलय् जूगु विद्यार्थी आन्दोलनय् तत्कालीन सरकारया गोलीं कयाः तुलाधर मदुगु खँ कनादीगु खः ।

अबले सीम्ह तुलाधरया लाश तकं बेपत्ता यायेत स्वःगु खःसां आन्दोलन झन तच्वइगु खानेदयाः छेँजःपिंत लाश लःल्हाःगु व वय्कःयात न्हापांम्ह विद्यार्थी शहीद घोषणा याःगु खँ खः । वय्कःयात शहीद घोषणा याःसां सरकारं खास हे छुं सुविधा धाःसा मबिउगु खँ वय्कःया किजां कनादिल । ङत तुलाधरपाखें शहीद चिनि काजि तुलाधरया स्‍मृतिइ दँय्दसं गुणानुस्मरण सभा याइगु जूगु दु ।

सम्बन्धित बुखँ

LEAVE YOUR COMMENTS