श्रमजिवी पत्रकार ऐन बारे अन्तक्र्रिया
येँ – नेपाल पत्रकार महासंघ उपत्यका प्रदेश, एसोसियत प्रदेश व प्रतिष्ठान प्रदेशया मंकाः ग्वसालय् बतीसपुतलीइ सोमवाः ‘श्रमजीवी पत्रकार ऐनया कार्यान्वयन ः समस्या व समाधानया उपाय’ विषयय् अन्तक्र्रिया ज्याझ्वः जुल ।
ज्याझ्वःया मूपाहाँ न्यूनतम पारिश्रमिक निर्धारण समितिया अध्यक्ष गंगाधर पराजुलीं न्यूनतम पारिश्रमिकयात थःपिसं आः अधिकतम यायेत स्वयाच्वनागु न्ह्यथनादिसें क्वय्या तहया श्रमजिवी पत्रकारतय्त ऐन क्वछिनातःगु स्वयां अप्वः पारिश्रमिक चूलाकेत थःपिसं ज्या यानाच्वनागु खँ कनादिल ।
ज्याझ्वलय् एसोसियट प्रदेशपाखें शिव सत्याल, प्रतिष्ठानपाखें कालिका सिवाकोटी व उपत्यका प्रदेशपाखें श्रृजन झापिसं थः थःगु ज्यापौ न्ह्यब्वयादीगु खः । ज्यापौयात कयाः टिप्पणी यानादिसें न्यूनतम पारिश्रमिक निर्धारण समितिया पुलांम्ह अध्यक्ष डा. सुरेश आचार्यं सैद्धान्तिक, व्यवहारिक व कुटनीतिक तवरं मिडियाया वर्गीकरण लिपा जक समितिया ज्या पुवंके फइगु जानकारी बियादिल ।
नेपाल पत्रकार महासंघया पुलांम्ह केन्द्रीय अध्यक्ष डा. महेन्द्र विष्टं राष्ट्रिय आमसञ्चार नीति लागु जुइमाः धयादिल । पुलांम्ह महासचिव रामजी दाहाल, सचिव रामप्रसाद दाहाल, प्रेस युनियनया उपाध्यक्ष खिला कार्की, प्रेस चौतारीया रामगोपाल ऐलेन, गंगा उप्रेति, केशव बोहरा लगायतं टिप्पणी यानादीगु खः । ज्याझ्वः प्रतिष्ठान प्रदेशया अध्यक्ष शेखर अधिकारीया सभापतित्वय् जूगु खः । ज्याझ्वलय् नवनिर्वाचित उपत्यका, एसोसियट व प्रतिष्ठानया पदाधिकारीपिंत हनेज्या नं याःगु खः ।
LEAVE YOUR COMMENTS