स्कुल बन्दया निर्णयं अन्यौल
येँ – सरकारं थ्वहे चैत ५ गते दुने फुक्कं स्कुलया जाँच क्वचायेकाः मस्तय्त बिदा बीत निर्देशन बिउसां नं गुलि ई विदा बीगु धइगु खँय् धाःसा अन्योल ब्वलंगु दु । सरकारं याकनं जाँच क्वचायेकाः बिदा बिउ धाःगुलिं फुक्क धइथें स्कुलं धमाधम जाँच कायेगु ज्या यानाच्वंगु दु । चैत ५ गते दुने हे जाँच क्वचायेकेगु कथं आपालं स्कुलं म्हिगः शनिवाः तकं जाँच काःगु खः ।
जगत सुन्दर ब्वनेकुथिया प्रिन्सिपल सुनिता मानन्धरं ‘नेपालभाषा टाइम्स’ यात कनादी कथं सरकारया स्पष्ट निर्देशन मवःगुलिं गबले तक बिदा बीगु धइगु अन्योल ब्वलनाच्वंगु दु । आः स्कुल गबलेनिसें चायेकेगु धइगु बारे अभिभावकतलिसे च्वनाः सहलह न्ह्याकाच्वनागु खँ कँसें छगू तगिंनिसें न्हय्गू तगिंया मस्तय्त वैशाख लिपा जक क्लास न्ह्याकेगु कथं तयारी जुयाच्वंगु खँ नं कनादिल । च्यागूनिसें झिगू तगिं तकया मस्तय्त धाःसा चैतया लिपांगु वालंनिसें क्लास न्ह्याकेगु तयारी जुयाच्वंगु दु ।
काठमाडौं मोडल इङलिस स्कुलया डाइरेक्टर राजेन्द्र महर्जनं नं सरकारया स्पष्ट निर्देशन मदयाः स्कुलत अन्यौलय् लानाच्वंगु खँ कनादिल । जाँच क्वचायेवं विदा बियाः वैशाखं जक स्कुल चायेकेगु तयारी थःपिसं यानाच्वनागु खँ वय्कलं कनादिल । वय्कलं धयादी, ‘चैत दुने सरकारं स्कुलय् छुं नं कथंया ज्याझ्वः यायेमते धाःगुलिं छुं ज्याझ्वः जुइ मखु, विदा हे बीगु जुइ ।’ एन प्याब्सनं थःगु संस्थाय् आवद्ध जुयाच्वंगु विद्यालययात वैशाखं जक स्कुल चायेकेगु निर्देशन बीधुंकूगु दु । तर वैशाखया गुगु वालं निसें स्कुल चायेकेगु धइगु बारे धाःसा अन्यौल हे तिनि ।
उकथं हे प्याब्सनं नं थःगु संस्थाय् आवद्ध जुयाच्वंगु विद्यालययात चैत ५ गते तक जाँच क्वचायेकाः विदा बीगु निर्णय याःगु खँ न्यू जेनिथ इङ्गलिस स्कुलया राजु महर्जनं ‘नेपालभाषा टाइम्स’ यात कनादिल । सरकारं चैत ५ गते जाँच क्वचायेकेगु नीति काःगुलिं थःपिंसं न्हापा स्वयां न्ह्यः हे जाँच कयागु खँ कँसें जाँच क्वचायेवं चैत महिना पूवंक हे स्कुल बन्द जुइगु जानकारी नं वय्कलं बियादिल । स्कूलत अप्वः बन्द जुल कि विद्यार्थी मेथाय् वनी धइगु चिउताः नं निजी स्कुलतय्त जुयाच्वंगु दु ।
तर गुलिखे स्कुलं धाःसा चैत ६ गतेनिसें जक जाँच कायेगु तयारी यानाच्वंगु खँ जगत सुन्दरया प्रिन्सिपल मानन्धरं कनादिल । आपालं स्कुलं थःपिनिगु कोर्स हे पूवंके मलाःगु कारणं जिल्लास्तरीय जाँचय् लिच्वः लाःगु खँ वय्कलं कनादिल । वय्कःया कथं कोर्स पूमवंक व रिपिड हे मयासे जाँच काये माःगुलिं थुगुसी विद्यार्थीया रिजल्ट बांलाः मजुइगु बिचाः नं वय्कलं तयादिल ।
LEAVE YOUR COMMENTS