सामाजिक सुरक्षा कोष निजी क्षेत्रया उत्साहपूर्ण सहभागीता

येँ – सामाजिक सुरक्षा कोषय् निजी क्षेत्रं उत्साह कथं ब्वति काःगु दु । कोषय् आः तक ५४६ गू कम्पनी सूचीकृत जूगु दु । सरकारं शुरु याःगु कोषय् सूचीकृत जूपिं बैंक, उद्योग, बचत तथा ऋण सरकारी संस्था लिमिटेड, अस्पताल लगायत दु । कोषय् देय्या तःधंम्ह उद्यमी विनोद चौधरी, चन्द्रप्रसाद ढकाल, हरिभक्त शर्मा लगायतया कम्पनी सूचीकृत जुइधुंकूगु दु ।

चौधरी ग्रुप अन्तर्गत दुगु सीजी इलेक्ट्रोनिक्स, सीजी फिन्को, सीजी शाश्वत धाम, नर्भिक हस्पितल, नविल बैंक लगायत सूचीकरण जुइधुंकूगु दु । अथेहे आइएमई ग्रुप, देउराली जनता फर्मास्युटिकल्स, जगदम्बा स्टील्स, आइएमई अटोमोटिभ्स प्रालि लगायतया कम्पनी नं कोषय् सूचीकरण जुइधुंकूगु दु ।

कम्पनी सूचीकरण यायेगु निंतिं कोषं थःगु तयारी तीव्र याःगु दु । कोषं चालू आर्थिक दँया अन्त्य तकय् रोजगारदाताया ल्याः, श्रमिकया ल्याः सम्बन्धी ज्या क्वचायेकेगु खँ धाःगु दु । ध्यबा म्हयेगु ज्या धाःसा वइगु आर्थिक दँ निसें न्ह्याकेगु खँ धाःगु दु । कोषं प्राविधिक पक्षयात नं सुदृढिकरण यायेगु तयारी याःगु दु ।

कोषय् देय्या तःधंम्ह उद्यमी विनोद चौधरी, चन्द्रप्रसाद ढकाल, हरिभक्त शर्मा लगायतया कम्पनी सूचीकृत जुइधुंकूगु दु । चौधरी ग्रुप अन्तर्गत दुगु सीजी इलेक्ट्रोनिक्स, सीजी फिन्को, सीजी शाश्वत धाम, नर्भिक हस्पितल, नविल बैंक लगायत सूचीकरण जुइधुंकूगु दु ।

छम्ह ज्यामिं थःगु कोषय् ध्यबा जम्मा जूगु मजूगु मोबाइलं सीकेगु प्रविधिया विकास यायेगु तयारी कोषं यानाच्वंगु दु । कोषया कथं कोषं आः प्रारम्भिक चरणया ज्या यानाच्वंगु दु । थुगु आर्थिक दँय् कोषं कम्पनी सूचीकरण व भेरिफाइ यायेगु ज्या याइ । आर्थिक दँ २०७६÷०७७ निसें धाःसा पूर्ण क्षमताय् ज्या जुइ ।

कोषय् अनलाइन रोजगारदाता संकलन यायेगु ज्या जुयाच्वंगु दु । रोजगारदाताया संकलन ज्या क्वचायेवं कर्मचारीया दाता संकलन यायेगु ज्या न्ह्याइ । थुगु आर्थिक दँय् फुक्कं कथंया प्राविधिक ज्या क्वचायेकाः लिपाया आर्थिक दँनिसें ध्यबा संकलन यायेगु ज्या न्ह्याकेगु तयारी जुयाच्वंगु दु ।

कोषय् थौंकन्हय् १९ अर्ब ६९ करोड तका दां मुनाच्वंगु दु । थुगु ध्यबा थौंकन्हय् बैंक ब्याजय् तयेगु तयारी जुयाच्वंगु दु । कोषया ज्या यायेत कर्मचारीया अभाव जूगुलिं थप कर्मचारी भर्ना यायेगु तयारी नं कोषं यानाच्वंगु दु । उकिया निंतिं लोकसेवा आयोगं नं स्वीकृति बीधुंकूगु दु ।