ने. सं. ११४३ चौलाथ्व सप्तमी -

निगमया वाइडबडी असार १४ य् येँय् थ्यनीगु

येँ – नेपाल वायुसेवा निगमं हयेत्यंगु तग्वःगु वाइडबडी जहाज वइगु असार १४ गते येँ थ्यनीगु जूगु दु । निगमं अन्नपूर्ण नां बियातःगु उगु विमान आः फ्रान्सय् उडान परीक्षण जुयाच्वंगु खँ धाःगु दु । नेपाली अमेरिकी कम्पनी एएआरयाके न्यायेत्यंगु निगः वाइडबडी विमान मध्ये येँय् थ्यंकः वयेत्यंगु थ्व न्हापांगु विमान खः । थ्व विमानं वइगु साउनया न्हापांगु वाः निसें व्यावसायिक उडान सुरु यायेगु तयारी यानाच्वंगु दु ।

न्हूगु विमान येँ थ्यंगु झिंन्यान्हु दुने हे आवश्यक प्रक्रिया पूवंकाः व्यावसायिक उडान यायेगु खँ धाःगु दु ।मुक्कं २७४ गू सिट दइगु थ्व जहाजय् १६ गू बिजनेस क्लासया व मेगु इकोनामि क्लासया सिट दइ । निगमया महाप्रबन्धक सुगतरत्न कंसाकारं नेपाःया पर्यटन प्रवद्र्धनय् ग्वाहालि यायेगु लक्ष्य तयाः जहाज न्यायेत्यनागु व थुकिं नेपाःया उडान ख्यलय् निगमया भाग नं अप्वयेकीगु विश्वास प्वंकादीगु दु ।

निगमं वंगु २०७३ चैत २५ गते अमेरिकी लिजिङ कम्पनी एएआरलिसे निगः वाइडबडी ए ३३०–२२० एयरबस न्यायेगु सम्झौता याःगु खः । थ्व विमान न्यायेगु निंतिं निगमं कर्मचारी सञ्चय कोष व नागरिक लगानी कोषपाखें त्यासा काःगु खः ।निगः जहाज २१ अर्ब ९० करोड तकां न्यायेत्यंगु खः । सम्झौता कथं थ्व विमान वंगु अप्रिलय् वयेमाःगु खःसां आः निला लिपा जक वयेत्यंगु खः ।

थ्व जहाजं न्हापां दोहा व दुबइलय् उडान यायेगु तयारी यानाच्वंगु दुसा छुं ई लिपा जापान व चीनया थीथी शहरय् नं उडान याइगु खँ धाःगु दु ।निगः जहाज मध्ये न्हापांग विमान येँय् थ्यंगु निला लिपा मेगु विमान वइगु खँ धाःगु दु ।थ्व विमानं दक्षिण कोरिया, जापान, अस्ट्रेलिया, लन्डनय् ब्वयेकेगु तयारी जुयाच्वंगु खँ निगमं धाःगु दु ।