खुलामञ्चय्र पार्किङ विरुद्ध ज्ञापन

येँ (नेपालभाषा टाइम्स)- येँ महापालिकां खुलामञ्चया खाली जग्गाय् भूमिगत पार्किङ दयेकेगु धकाः हःगु योजनाया प्यखेरं विरोध जूगु दु । सम्पदा अभियन्तातय्सं थौं मनपाया मेयर बालेन साहयात नापलानाः पार्किङ दयेके मजिउ धकाः ज्ञापनपौ बीगु तयारी यानाच्वंगु दु ।

महानगरपालिकां न्याद्वःगः गाडी न्ह्यनी कथं खुलामञ्चय् स्वतँजाःगु भूमिगत पार्किङ दयेकेगु धकाः विस्तृत अध्ययन न्ह्याकेगु निर्णय याःगु खः । तर अन गाः म्हुयाः पार्किङ दयेकल धाःसा उकिं यानाः येँया पर्यावरण स्यनीगु जक मखु भूमिगत लःया भण्डार खलबल जुयाः कोर लागाय् च्वंगु ल्वहंहितितय् लःयागु प्रणाली हे ध्वस्त जुइफु धासें सम्पदा अभियन्तातय्सं थुकिया विरोध यानाच्वंगु दु । नापं शहरया भित्री लागाय् थथे द्वलंद्वः गाडी न्ह्यनीगु पार्किङ दयेकल धाःसा उकिं हे यानाः यातायात प्रणाली झन् हे अस्तव्यस्त जुइगु खँ नं विज्ञतय्सं धयाहःगु दु ।

मनपां अन पार्किङ दयेकेगु धकाः हःगु प्रस्तावयात मनपा २३ वडाया वडा अध्यक्ष मचाराजा महर्जनं नगर परिषद्य् हे विरोध यानादीगु खःसां मेयर साहं उकियात वास्ता मयाःगु खँ सीदुगु दु । अथे पार्किङ निर्माण जुइ धयातःगु वडा २८ या वडाध्यक्ष भाइराम खड्गीं नं थःगु वडाय् अज्याःगु पार्किङ दयेकेत्यंगु बारे थःपिंत छुं जानकारी तकं मवःनि धयादीगु दु । उलि जक मखु उपमेयर सुनिता डंगोलं तक नं स्थानीय जनतालिसे छुं हे संवाद मयासे पार्किङ दयेकेगु कुतः यात धाःसा उकियात थम्हं विरोध यायेगु जुइ धयादीधुंकूगु दु ।

थ्वहे झ्वलय् नेपाःया आर्किटेक्ट– तय्गु संगठन ‘सोना’ पाखें छगू विज्ञप्ति पिकासें राज्यया गलत नीतिं यानाः येँय् यातायात अस्तव्यस्त जुयाच्वंग खँ धाःगु दु । उगु संस्थां येँय् आः धरहरा, काठमाडौं टावर, एनएसी आदि लागाय् थप पार्किङ व्यवस्था यायेत्यंगु जुयाः तिंख्यः हे स्यनी कथं न्हूगु पार्किङ दयेम्वाःगु खँ नं धाःगु दु ।
थुलिमछि विरोध जुइक जुइक नं मेयर साह धाःसा न्ह्याथे यानाः नं पार्किङ दयेकां त्वःते धकाः लगे जुयाच्वंगुलिं वय्कः नं ठेकेदारतय्सं बीगु कमिशनया लोभय् फँसे जुइधुंकूगु खः ला धकाः आशंका यानाहःगु दु ।

मेयरं थौं ज्ञापन बुझे मयाइगु
पार्किङया विरोधय् ज्ञापनपत्र बिउ वइपिं अभियन्तातय्सं मेयर साहं थौं सुथय् १०ः३० बजे ई बियादीगु खःसां म्हिगः हानं फुर्सद मखु, थौं नापलाये मखु धकाः खबर छ्वयाहःगु खँ सीदुगु दु । वय्कलं आः वइगु माघ महिना तक थःके फुर्सद मदु धकाः अभियन्तातय्त धयादीगु खँ नं सीदुगु दु ।

थ्वहे पुस महिनाय् मनपाया नगर परिषद्या बैठक च्वनेत्यंगु दु । यदि पार्किङया विवाद नगर परिषद्य् प्रवेश जुल धाःसा अन प्रस्ताव लित कायेमालीगु तकया अवस्था वयेफु धइगु अनुमान यासें वय्कलं नगर परिषद् छले यायेत स्वयाच्वंगु आशंका नं यानाहःगु दु । अभियन्तातय्सं धाःसा वय्कः मदुसा सचिवालयय् जूसां ज्ञापनपत्र दर्ता याना थकेगु जुइ धाःगु दु ।