यल महानगरं धुँ लहीगु !

यल(नेपालभाषा टाइम्स)- यल महानगरपालिकां चिडिया—खानाया धुँ लहीगु भाला काःगु दु । यल महानगरं चिडियाखानाय् च्वंम्ह धुँया निंतिं माःगु सकतां नसाज्वलंया व्यवस्था यायेगु नापं मेमेगु आवश्यक खर्च व्यहोरे याइगु जूगु दु ।

यल महानगर प्रमुख चिरिबाबु महर्जनं चिडियाखानाय् च्वंम्ह धुँया अभिभावकत्व ग्रहण यायेगु जानकारी बियादीगु दु । जावलाख्यलय् च्वंगु चिडियाखानाया २७ क्वःगु वार्षिकोत्सव ज्याझ्वलय् नवासें वय्कलं चिडियाखानां निदँ न्ह्यः शुरु याःगु ‘एडप्ट एन एनिमल’ ज्याझ्वःयात यल महानगरं नं ग्वाहालि यायेगु ल्याखं धुँया अभिभावकत्व ग्रहण यायेगु जानकारी बियादीगु खः ।

निदँ न्ह्यः तत्कालीन प्रधानमन्त्री केपी शर्मा ओलीं चिडियाखानाय गैैंडाया अभिभावकत्व ग्रहण यानाः उगु ज्याझ्वः न्ह्याकादीगु खः। ज्याझ्वलय् यल महानगर प्रमुख महर्जनं चिडियाखाना सकसिगुं आकर्षणया केन्द्र जूगु व थुकिया संरक्षण व संवद्र्धनया निंतिं महानगरपालिकां ग्वाहालि यायेगु जुइ धासें चिडियाखाना चाःहिलेत वइपिं ज्येष्ठ, अशक्त नागरिकया निंतिं सुविधाजनक गाडीया व्यवस्थापन यायेगु नं धयादीगु दु ।