ने. सं. ११४६ तछलागा एकादशी - याेगिनी एकादशि

दलाई लामाया बुन्हि न्यायेके बिउगुया विरोध

नेपाः स्वतन्त्र व असंलग्न परराष्ट्र नीतिपाखें विचलित जूगु द्वपं

येँ (नेपालभाषा टाइम्स) – तिब्बती धर्मगुरु दलाई लामाया जन्मोत्सव न्यायेकेत नेपाः सरकारं हे अनुमति बिउगु धासें थीथी थासं विरोध यानाहःगु दु । थ्व झ्वलय् म्हिगः नेकपा एमालेया सांसदतय्सं प्रतिनिधिसभाय् थ्व बारे खँ ल्ह्वंगु दु । दलाई लामाया जन्मोत्सव न्यायेकेत सरकारं अनुमति बिउगु धासें एमालेया प्रमुख सचेतक ऐन महरं आपत्ति प्वंकादीगु खः । वय्‌कलं नेपाःया इतिहासय् न्हापांखुसी दलाई लामाया जन्मोत्सव न्यायेकेत सरकारपाखें अनुमति बिउगु धासें नेपाः सरकारं एक चीन नीति त्वःतूगु खः ला धयागु न्ह्यसः तयादिल ।

म्हिगः संसदय् सम्बोधन यायेगु झ्वलय् सांसद महरं धयादिल, ‘नेपालं सलंसः दँनिसें छगू चीन नीतिया समर्थन याना वयाच्वंगु दु । अथे खःसां सन् १९५९ सालय् चीनं बिसिउँ वनाः विदेशय् शरण कयाच्वंम्ह पृथकतावादी नेता दलाई लामाया ९१ क्वःगु जन्मन्हि न्यायेकेत वर्तमान सरकारं वंगु असार २२ गते अनुमति बिल । थ्व नेपाःया इतिहासया हे निर्लज्जतापूर्ण ज्या खः ।’ वय्‌कलं स्वयम्भूसिथ्त नाम्ग्याल निम्न माध्यामिक विद्यालयय् ज्याझ्वः याकेबियाः नेपाः व चीन दथुइ दौत्य सम्बन्ध थापना जूसां निसें दयाच्वंगु सुमधुर सम्बन्धयात स्यंकाः राष्ट्रहित विरोधी ज्या सरकार पाखें हे याःगु द्वपं नं बियादिल ।

सांसद महरं उगु ज्याझ्वलय् अमेरिकी, फ्रान्सेली, युरोपेली युनियन व अष्ट्रेलियाया राजदूतपिंसं ब्वति काःगु तसकं गम्भीर व आपत्तिजनक जूगु खँ धासें धयादिल, ‘पश्चिमा शक्तित नेपाःयात चीन विरोधी अखडा दयेकेत व नेपाःयात युक्रेन दयेकेत दुने दुने गुकथं षडयन्त्र यानाच्वंगु दु धयागु खँ थुगु घटनां स्पष्ट याःगु दु । नेपाःया भूमिइ वयाः झीसं झी जःलाखःला देय् विरुद्ध सुयातं छ्यले बीमजिउ, अले अज्याःगु अधिकार सुयात नं मदु ।’

सांसद महरं चीनया निंतिं नेपाःया पुलांपिं राजदूततय्सं तकं विज्ञप्ति पिथनाः विरोध याःगु सन्दर्भयात न्ह्यथँसें धयादिल, ‘छु वर्तमान सरकार छगू चीन नीतिया विरुद्धय् वनाच्वंगु खः ला ? स्पष्ट यायेमाल । छु वर्तमान सरकारया जःलाखःला लिसेया परराष्ट्र नीति हिउगु खः ला ? थ्व खँया लिसः थ्व सरकारं बीमाः ।’ म्हिगः जक चीनया निंतिं नेपाःया राजदूत जुइधुंकूपिं पुलांपिं न्हय्म्ह राजदूततय्सं दलाई लामाया जन्मोत्सव खुला रुपय् न्यायेकेबिउगु खँयात कयाः मंकाः विज्ञप्ति पिथनाः विरोध याःगु खः ।

उकथं हे म्हिगः हे पुलांम्ह परराष्ट्र मन्त्री नारायणकाजी श्रेष्ठं वर्तमान सरकारं नालाच्वंगु परराष्ट्र नीतिप्रति गम्भीर आशंका प्वंकादिसें सरकारयात ख्याच्वः बियादीगु दु । वय्कलं नेपालं ताः इलंनिसें नाला वयाच्वंगु ‘स्वतन्त्र व असंलग्न परराष्ट्र नीतिं’ सरकार विचलित जुइत स्वःगु द्वपं नं बिउगु दु ।

श्रेष्ठं सामाजिक सञ्जालय् स्टाटस च्वसें लामाया जन्मोत्सव न्यायेकेत सरकारं औपचारिक अनुमति बिउगु व अज्याःगु ज्याझ्वलय् पश्चिमा कूटनीतिज्ञया उपस्थिति जुइगु सामान्य घटना मजूगु धासें सुशीला कार्की नेतृत्वया अन्तरिम सरकार व वर्तमान बालेन साह नेतृत्वया सरकारं दलाई लामा व वया ‘कथित सरकार’ या पाखे वःगु बधाई व सन्देशयात कयाः नं आशंका प्वंकादीगु दु । उकथं हे पुलांम्ह प्रधानमन्त्री झलनाथ खनालं नं सरकारं दलाई लामाया जन्मन्हिं न्यायेकेत अनुमति बिउगु धासें गम्भीर आपत्ति प्वंकादीगु दु ।