स्वनिगलय् झिगू ततःधंगु उद्यान दयेकीगु

येँ (रासस)- काठमाडौं उपत्यका विकास प्राधिकरणं स्वनिगःया थीथी थासय् झिगू उद्यान दयेकीगु जूगु दु । विपद व्यवस्थापन व जलवायु अनुकूलनया नितिं उद्यान दयेकेगुत्यनागु खँ प्राधिकरणया सूचना अधिकारी लिसें इन्जिनियर सौरब ढकालं कनादीगु दु ।

प्राधिकरणं येँया शंखरापुर नगरपालिकाय् शाली खुसी, नागार्जुन नगरपालिकाया घटालाबाबा देगः, कागेश्वरी नगरपालिकाया कोगेश्वरी व नवतमधाम, किपू नगरपालिकाया चम्पादेवीइ उद्यान दयेकेत्यंगु खः ।

उकथं हे यल महानगरपालिकाय् स्वंगू उद्यान दयेकीगु खँ नं धाःगु दु । यल महानगरपालिकाया १३ नम्बर वडाय् मच्छेन्द्र, २१ वडाय् पञ्चोद्यान, २७ बालकुमारी उद्यान दयेकीगु जूगु दु । यल मनपाया हे वडा नं. २५ सैबु भैसेपाटीइ च्वंगु सार्वजनिक जग्गा संरक्षण यानाः उद्यान दयेकीगु दु ।

यलया हे महालक्ष्मी नगरपालिका–८ ढुंगेलटोलस्थित लुभू माध्यामिक विद्यालय लिउने दुगु सार्वजनिक जग्गा संरक्षण यानाः उद्यान दयेकीगु जूगु दु । उद्यान दयेकेगु कार्यक्रम अन्तर्गत ख्वपया थीथी थासय् दुगु सार्वजनिक जग्गा संरक्षण यानाः हरियाली प्रवद्र्धन याइगु जूगु दु । स्थानीय तहलिसे सहकार्य यानाः सार्वजनिक जग्गा संरक्षण यानाः उगु थासय् उद्यान निर्माण यायेत्यंगु खः । स्वंगुलिं जिल्लाय् उद्यान दयेकेत १० लाख बजेट विनियोजना यानागु खँ प्राधिकरणं धाःगु दु ।