दकलय् अप्वः सहभागिता दुगु बसुन्धरा पुजा

यल – वंगु यंलागा तृतिया कुन्हु थन तःजिक बसुन्धरा द्यः धलं (गातिलाः धलं) दनेगु ज्या जुल । यंलागा तृतियाकुन्हु धलं दनेधुंकाः वयां कन्हय्कुन्हु यलया थीथी थासय् च्वंपिं बसुन्धराया नं तःजिक पुजा याःगु खः । थ्व झ्वलय् थनया थीथी थासय् विराजमान जुयाच्वंपिं न्हय्छम्ह बसुन्धरा द्यःया पुजा जूगु खः ।

थुगुसी बसुन्धरा द्यःया धलं दनेगु पाः थनया छम्ह नांजाःम्ह द्यःमांकथं म्हसिउम्ह निक्वः ज्याःजंक्व क्वचायेधुंकूम्ह च्यासः त्वाःया धनमय्जु द्यःमां नं पाः फयादीगु खः । थुगुसी जूगु बसुन्धराया धलं दनेगु ज्याय् भक्तजनतय् ऐतिहासिक रुपं हे सहभागिता दुगु खः । थुगुसी स्वीन्यासलं मल्याक श्रद्धालु भक्तजनं धलं दंगु खः ।

थ्व ल्याः धइगु आतकया हे दकलय् अप्वः खः । धलं मुंकेगु ज्या व्यक्तिगत रुपं द्यःमां धनमय्जुं यानादीगु खःसां नं धलं दनेत माःगु सकतां व्यवस्थापन च्यासः त्वाःया मंकाः खलकं याःगु खः । उकिया निंतिं च्यासः मंकाः खलःया नायः श्याम ब्यञ्जनकारया संयोजकत्वय् सछि व छम्हेसिया बसुन्धरा पुजा व्यवस्थापन समिति –११३९ नीस्वंगु खः ।

द्यःमां धनमय्जुया छम्ह पारिवारिक दुजःया कथं बसुन्धरा पुजा ताःलाकेत नीस्वंगु व्यवस्थापन समितिइ च्यासः त्वाःया विशिष्ट व्यक्तित्वपिं नापं लिक्क लाःगु खपिन्छेँ, क्वय्लाछि, भिंद्यःलाछि, च्वछेँ, ओल्खु चिवाःचा, भिलाछेँ, गःछेँ व चिकंबहीया त्वाः नायःपिं दुजः कथं च्वनादीगु खः ।

व्यवस्थापनय् ग्वाहालि यायेत च्वंगु दक्वं त्वालं स्वयंसेवकया व्यवस्थापनय् नं ग्वाहालि याःगु खःसा वडा स्वास्थ्य कार्यान्वयन समिति वडा नं. ९, नेपाल रेडक्रस सोसाइटीं नं थाय्थासय् स्वास्थ्य शिविर तयाः प्राथमिक उपचार सेवा उपलब्ध याःगु खः ।

अप्वःथें मिसातय् सहभागिता दुगु पुजाय् समय्ज्वलं, सिसाबुसा, हलिमलि व मरिचरि छायेगु ज्या जूगु खःसा सुथसिया ११ ताःइलय् शुरु जूगु पुजा बहनिसिया करिब १०ः३० ताः इलय् क्वचाःगु खः ।

पुजा सिधयेकाः ब्वति काःपिं सकसितं उकुन्हु हे भ्वय् नकेमाःगु खःसां पुजा लिबाक्क सिधःगुलिं कन्हय्कुन्हु झिंनिसःयात प्रसाद ग्रहण याकूगु खः । ग्वसाः खलकं बिउगु जानकारीकथं पाः फयादीम्ह द्यःमां धनमय्जुपाखें नीन्यागू लाख खर्चया व्यवस्थापन याःगु खःसा श्रद्धालुपिंसं द्यःयात छाःगु पुजा (भाग) नापं यायेबलय् करिब ७० लाख खर्च जूगु अनुमान याःगु दु ।

सम्बन्धित बुखँ

LEAVE YOUR COMMENTS