‘अमेरिकायात पौ छाय् मच्वयागु ?’
येँ (नेपालभाषा टाइम्स)÷ प्रतिनिधिसभाया अन्तर्राष्ट्रिय सम्बन्ध समितिं स्टेट पार्टनरसिप प्रोग्राम (एसपीपीं) पिहां वयेगु निर्णय कार्यान्वयन यायेगु बारे अमेरिकायात छाय् पत्राचार मयानागु धासें लिसः बीत सरकारयात निर्देशन बिउगु दु ।
एसपीपीयात कयाः देय्न्यंकं विरोध जुइवं सरकारं एसपीपीइ ब्वति मकायेगु धकाः निर्णय याःगु खःसा उकिया बारे अमेरिकायात जानकारी याकेगु खँ धाःगु खः । तर निर्णय जूगु लत्या दयेधुंकाः नं सरकारं पत्राचार धाःसा याःगु मदुनि ।
उकथं हे नेपाली सेनाया प्रधानसेनापति प्रभुराम शर्मां अमेरिकाया इन्डो–प्यासिफिक कमान्डं अष्ट्रेलियाय् ग्वसाः ग्वःगु वार्षिक सम्मेलनय् ब्वति काःगु बारे जानकारी याकेत नं सरकारयात निर्देशन बिउगु दु । अमेरिकाया इन्डो–प्यासिफिक कमाण्ड व अष्टे«लियाया डिफेन्स फोर्सया सहआयोजनाय् नीप्यक्वःगु वार्षिक सम्मेलनय् ब्वति कायेत प्रधानसेनापति उखे वंगु खः । नेपाः लिसें २६ देय्या सैनिक अधिकारीतय्सं उकी ब्वति काःगु खः ।
मेखे प्रधानसेनापति शर्मा अष्टे«लिया वनेधुंकाः जारी याःगु विज्ञप्तिइ एसिया प्रशान्त क्षेत्रय् दुगु राष्ट्रया सेना प्रमुखपिनि उपस्थितिइ जुइगु ज्याझ्वलय् २०५६ सालं निसें ब्वति कया वयाच्वनागु खँ न्ह्यथनातःगु दु । सेनाया विज्ञप्तिइ धयातःकथं उगु सम्मेलनय् थीथी राष्ट्रया सेना प्रमुखतय् दथुइ अन्तर्राष्ट्रिय सुरक्षा वातावरण, प्रविधि, रणनीतिक सोच लिसें समसामयिक विषयय् नं अन्तक्र्रिया जुइ । थुगु सम्मेलन थ्व स्वयां न्ह्यः ‘प्यासिफिक कमाण्डं’ ग्वसाः ग्वया वयाच्वंगु खः । सन् २०१८ निसें अमेरिकां प्यासिफिक कमाण्डयात ‘इन्डो–प्यासिफिक’ कमाण्डय् हिउगु खः ।
नेपाः सुयां सुरक्षा चाकलय् च्वनी मखु
नेकपा एकीकृत समाजवादीया अध्यक्ष माधव नेपालं नेपाः गुगुं नं कथंया सैन्य गठबन्धनया चाकः दुने मच्वनेगु खँ धयादीगु दु । म्हिगः अन्तर्राष्ट्रिय सम्बन्ध समितिइ अमेरिकी सहयोग परियोजना एसपीपी बारे सहलह यायेगु झ्वलय् वय्कलं नेपाःयात सैन्य गठबन्धन दुने सालेगु वा नेपाःयात छ्यलेगु धइगु भ्रमं मुक्त जुइत नं इनाप यानादिल । अध्यक्ष नेपालं एसपीपी सम्झौता पुलांगु एकदलीय सरकारं याःगु व आःया गठबन्धन सरकारं उगु सम्झौताय् ब्वति मकायेगु धकाः निर्णय यासें पौ छ्वयेगु निर्णय याःगुलिं सरकारयात सुभाय् बीत नं इनाप यानादीगु खः ।
समितिया बैठकय् नेता नेपालं धयादिल, ‘नेपालं थःगु परराष्ट्र नीतिइ पञ्चशील मान्यता नाला कायेधुंकूगु दु, नेपाःया जःलाखःलायात प्रहार यायेगु कथं सुं वल धाःसा उकियात स्वीकार यायेगु पक्षय् मदु ।’
LEAVE YOUR COMMENTS