स्वयम्भू ज्ञानमाला भजन सतःया उलेज्या

येँ- राष्ट्रपति विद्यादेवी भण्डारीं स्वयम्भू ज्ञानमाला भजन खलःया भजन सतःया उलेज्या यानादीगु दु । राष्ट्रपति भण्डारीं वंगु शनिवाः स्वयम्भू महाचैत्य परिसरय् च्वंगु भजन सतःया उलेज्या यानादीगु खः ।
उलेज्या लिपा राष्ट्रपति भण्डारीं मौलिकता ल्यंका तये फःसा जक पहिचान नं ल्यनाच्वनी धासें सकलें सहभागि जुयाः सम्पदाया संरक्षण याना तयेमाःगु खँय् बः बियादिल । लिसें वय्कलं सांस्कृतिक गतिविधिइ मिसापिनिगु सहभागिता अप्वःगु सकारात्मक पक्ष जूगु खँ धयादिल ।

राष्ट्रपति भण्डारीं नेपाः स्रोत व साधनं भरिपूर्ण जूसां नं आम नागरिकया समुन्नतिया निंतिं उकियात आवश्यककथं छ्यलाबुलाय् हये फयाच्वंगु मदु धयादिल । राजनीति याइपिंसं थें हे ज्ञानमाला भजन खलकं नं जहानिया राणा शासनया इलय् भजनपाखें राजनीतिक हिउपाःया निंतिं योगदान बिउगु वय्कलं धयादिल ।

येँ महानगरपालिकाया प्रमुख विद्यासुन्दर शाक्यं बुद्धवाणीयात भजनया माध्यमं जनमानसया नुगलय् तक थ्यंकेगु ज्या याना वयाच्वंगु धासें खलकं याना वयाच्वंगु ज्यायात कयाः च्वछायादिल ।
गुगुं इलय् नेवाः भासं भजन हालीगु इलय् उकियात मथुयाः शासकतय्ं भजन हालीपिंततकं ज्वना यंकूगु खँ न्ह्यथनादिसें भजन खलकं राजनीतिक हिउपाः व स्थानीय भाय्या प्रवद्र्धनया ज्याय् योगदान बिउगु महानगरप्रमुख शाक्यं धयादिल ।

भजन खलःया नायः तीर्थनारायण महर्जनं भजन सतःया पूर्णनिर्माण लिपा दँदँ न्ह्यवंनिसें न्ह्याना वयाच्वंगु भजनं हाकनं निरन्तरता काइगु जुल धासें लसता प्वंकादिल । लिसें वय्कलं भजन सतःयात अझ व्यवस्थित यायेत येँ महानगरपालिकां अभिभावकीय भूमिका म्हितूगुलिं नं भजन सतःया समस्या ज्यंके फुगु खः धयादिल ।

येँ महानगरपालिकां भजन खलःया अक्षय कोषया निंतिं वंगु साउनं २० गू लख तका दां बिउगु खः । उगु दामं प्राप्त जुइगु ब्याज खलःया धार्मिक, सामाजिक नापं भजन खलःया छेँ व सतःया आवश्यक सामग्रीया निंतिं छ््यलीगु जूगु दु ।

ने.सं. १०५७ (वि.सं. १९९४) निसें थौंतक मदिक्क न्हियान्हिथं भजन जुया वयाच्वंंगु स्वयम्भू ज्ञानमाला भजनय् जनआन्दोलन, कफ्र्यु, कोभिड थेंज्याःगु इलय् नं मदिक्क हे भजन जुया वयाच्वंगु दु ।
ज्याझ्वलय् भजन सतः पुनःनिर्माणय् थीथीकथं ग्वाहालि याःगु येँ महानगरया प्रवक्ता नापं १५ वडाअध्यक्ष ईश्वरमान डंगोल, पुलांम्ह राज्यमन्त्री तीर्थराम डंगोल, पुरातत्व विभागया पुलांम्ह महानिर्देशक भेषनारायण दाहाललिसें खलःया पदाधिकारीपिंत सम्मान नं याःगु खः ।

२०७२ सालया गोरखा केन्द्रीत भुखाचं व ०७६ सालय् मिं नयाः क्षति जूगु भजन सतः निगू करोड लागतय् पुनःनिर्माण याःगु खः ।

सम्बन्धित बुखँ

LEAVE YOUR COMMENTS