बालेनया सिंहदरवार च्याकेगु धापूयात प्यखेरं आलोचना
येँ (नेपालभाषा टाइम्स)- येँ महानगरपालिकाया मेयर बालेन साहं सिंहदरवार च्याका बी धकाः सामाजिक सञ्जालय् खुल्ला रुपं तयादीगु धापुतिं पिने धाःसा विवादया मि च्याका बिउगु दु । शनिवाः वय्कःया कलाःयात ज्वनाः लँय् वयाच्वंगु मनपाया सरकारी गाडीयात ट्राफिक प्रहरीं लँय् दिकाः शनिवाः कुन्हु नं सरकारी गाडी छाय् चले यानागु धकाः सोधखोझ यात धासें बहनी मेयर साहं ‘आवंलि मनपाया छुं नं गाडीयात लँय् गनं पन धाःसा सिंहदरवारय् मि तया बी, होस या खुँ सरकार’ स्टाटस तयादीगु खः ।
उलि जक मखु, वय्कलं वहे बहनी येँया सिडिओ जितेन्द्र बस्नेतयात फोन यानाः थःगु गाडीइ छाय् न्यनेकने यानागु धकाः न्यनेगु ज्या समेत यानादीगु खः । तर सिडियोया लिसलं वय्कःया चित्त बुझे मजुल खनिं, वय्कलं तुरुन्त हे सिंहदरवार च्याका बीगु स्टाटस च्वयादिल ।
वय्कःया उगु स्टाटसयात कयाः सामाजिक सञ्जालय् मेयर साहया तसकं आलोचना जुयाच्वंगु दु । कडा आलोचना वयेवं म्हिगः मेयर सचिवालयं छगू स्पष्टीकरण जारी यासें नकतिनि बूम्ह मचायात दुरु त्वंकेत वनाच्वंम्ह मेयर साहया कलाःयात लँय् चेकजाँच यानाच्वंपिं प्रहरीतय्सं कडा मिजासं न्यनेकने याःगु व मानवीय गुण तकं मक्यंगु धयातःगु दु ।
प्रहरीं मेयरया कलाः च्वना वःगु गाडीयात १ मिनेट जक लँय् पनागु खः धकाः स्पष्टीकरण बिउगु दुसा मेयर सचिवालयं ७ मिनेट पना तःगु धकाः द्वपं बिउगु दु ।
घटनाय् ट्राफिक प्रहरीं कडाइ याःगु धकाः द्वपं बिउसां मेयर साहं सिंहदरवार च्याका बी धइगु स्टाटस छाय् तल धइगु बारे धाःसा सचिवालयया विज्ञप्तिइ छुं धयातःगु मदु ।
वंगु गुन्हु न्ह्यः हे मेयर साहया कलातं छक्वलं निम्ह मचा बुइकूगु व उमिगु अवस्था बांलाः मजूगु खँ धाःगु दु । उमित आः मेडिसिटी अस्पतालया भेन्टिलेटरय् तयातःगु दु । तर थज्याःगु निजी ज्याय् सरकारी गाडी छ्यले जिउ लाकि मजिउ धइगु विवाद नं थुकिं ब्वलंका बिउगु दु ।
बालेनया श्रीलंका भ्रमण नं विवादय्
थःगु स्टाटसया कारणं कडा आलोचनाया शिकार जुइवं मेयर बालेन साह श्रीलंका वनीगु जूगु दु । श्रीलंकाय् नेपाः व भारत दथुइ जुइगु क्रिकेटय् ‘नेपाःमि कासामितय् मनोबल बढे यायेगु’ धासें वय्कः श्रीलंका वनेत्यंगु खँ धाःगु दु । तर थ्व कासाय् मेयर साह वनेमाःगु आवश्यकता दु लाकि मदु धइगु मेगु न्ह्यसः पिहां वःगु दु ।
नापं वय्कः श्रीलंका वन धाःसा उकिया खर्च मनपां व्यहोरे याइ लाकि वय्कःया निजी खर्च जुइ धकाः नं मेगु न्ह्यसः पिहां वःगु दु । अझ दकलय् ला थः नकतिनि बूपिं मस्त भेन्टिलेटर तयाः वासः याका तयेमाःगु संवेदनशील अवस्थाय्, कलाः व मचाया नापं च्वने माःगु इलय् वय्कः धाःसा उमित अथें त्वःताः श्रीलंका थ्यंक क्रिकेट स्वयाः न्ह्यइपुकः वनेत्यन धकाः नं आलोचना याना हःगु दु ।
LEAVE YOUR COMMENTS